Iniciativa pol Asturianu esixe al PP que torne a la llegalidá “llantada na Constitución y nel Estatutu"

La postura de la Delegación del Gobiernu estatal n’Asturies, qu’instó recién al Conceyu de Bimenes a anular la ordenanza d’asturianu aprobada’l 1 de xunetu, lleva a Iniciativa pol Asturianu a recordar la llegalidá de toles ordenances esistentes n’Asturies. El coleutivu encamienta al PP a un cambiu de postura pa col idioma.

“La so llegalidá ye indiscutible y la so tramitación impecable”, afirma la organización, qu’esixe al delegáu del Gobiernu, Gabino de Lorenzo, “y al PP al completu qu’abandonen esta llucha capitaneada pol odiu a la propia llingua, que vuelvan a la llegalidá llantada na Constitución y nel Estatutu d’Autonomía y que se pongan a trabayar col restu de partíos de la Xunta Xeneral por afitar los drechos que son yá innegables pa les asturianes y los asturianos”.  D’igual forma, quier tresmiti-yos “tol apoyu a los y les habitantes de Bimenes y da-yos la norabona por dar un pasu tan importante na normalización del idioma”.

El 1 de xunetu, nel marcu de la XXI Fiesta de la Oficialidá, celebróse en Martimporra un Plenu estraordinariu nel que por unanimidá de tolos grupos municipales (PAS, IX y Xente Yerbato, que conformen l’equipu de gobiernu, y el PSOE) aprobóse la Ordenanza Municipal pal Usu de la Llingua Asturiana nel Conceyu Bimenes. Un añu enantes, el Conceyu de Bimenes declaraba per segunda vez –la del 1997 foi torgada pol TSXA tiempu depués; una sentencia que ratificó darréu’l Tribunal Supremu– la oficialidá del asturianu nel conceyu.