Nueve alcaldes acudieron a Bimenes pa celebrar la oficialidá

El sábadu celebróse en Bimenes la XXI Fiesta de la Oficialidá, a la qu’acudieron nueve alcaldes y na que s’aprobó la ordenanza d’asturianu del conceyu. Ente ellos destacó la presencia del llavianés Adrián Barbón, candidatu a ser secretariu xeneral de la FSA-PSOE.

Un Plenu estraordinariu dio aniciu a la fiesta, comenzando cola aprobación de la Ordenanza Municipal pal Usu de la Llingua Asturiana nel Conceyu Bimenes por unanimidá de tolos grupos municipales: PAS, IX y Xente Yerbato, que conformen l’equipu de gobiernu, y el PSOE. Tamién s’aprobó nomar la Plaza de la Casa Conceyu como la Plaza de Miranda de l Douro, avanzando asina nel hermanamientu de Bimenes col territoriu portugués de fala asturlleonesa, votación na que’l PSOE s’astuvo allegando motivos de foma.

Tres l’actu procedióse a la inauguración de dicha plaza, desatapando una placa y un morriyu de granitu que Miranda regaló a Bimenes. Nunes selmanes, los portugueses van devolver el xestu bautizando una plaza en Miranda col nome de Bimenes, eventu nel que los asturianos van entregar de regalu una vagoneta de carbón.

A les celebraciones por esta xornada que conmemora la declaración d’oficialidá de Bimenes del 5 de xunetu del 1997, baxu mandatu del alcalde Xuacu García Gutiérrez, presente tamién nel actu, acudieron un total de nueve alcaldes, incluyíos el llocal Aitor García Corte y el mirandés Artur Nunes. Asina, desplazáronse al conceyu yerbatu los socialistes Barbón (Llaviana), Enrique Fernández Rodríguez (Samartín del Rei Aurelio), Juan Cañal (Nava) y Gerardo Fabián (Cabranes); José Antonio Roque (Peñamellera Alta), de Foro; Saúl Bastián, del Partido Independiento por el Progreso Municipal de Sariego; Amparo Antuña, d’Independientes por Noreña.

D’ente toos ellos destacó la presencia de Barbón, persona que va liderar una candidatura a la secretaría xeneral de la FSA que va tar sofitada pol sector ‘sanchista’ del partíu. Mentes, la oficialista va tar liderada por José María Pérez.

Fiesta de les Llingües

Na so intervención tres el Plenu estraordinaria, García Corte naguaba por que nun futuru la folixa yerbata pudiera camudar el nome a Fiesta de les Llingües, “yá que sería una bona noticial al tar reconocíu’l nuesu idioma como oficial”. Nesi sen, animó a tolos conceyos d’Asturies “pa que faigan declaraciones d’oficialidá asemeyaes”, asina como a los diputaos de la Xunta Xeneral a dar tamién el pasu.

“Somos un pueblu normal y corriente, nun hai que tener mieu al asturianu”, aseguró l’alcalde en referencia a la situación en Bimenes tres les dos declaraciones d’oficialidá, nel 1997 y 2016. Darréu llegaron les dances;  la xinta popular, “que foi un ésitu con más de 300 persones”; el concursu d’echadores de sidra, ganáu por Salvador Ondó; una actuación d’Anabel Santiago; y un ‘Bimenes en Danza’, cola participación de Cantaruxare y L’Andecha Turcipié.

Na semeya, los alcaldes de Bimenes y de Miranda de l Douro, Aitor García Corte y Artur Nunes, de manera respeutiva.