Barbón anuncia la so presencia n’An Oriant nel Añu d’Asturies nel Festival Interceltique

Per primer vez un presidente d’Asturies va desplazase a Breizh p’acudir al Festival Interceltique de Lorient. Va ser Adrián Barbón con motivu del Añu d’Asturies nel certame más importante del mundu celta, ún de los meyores escaparates que pue tener el país internacionalmente.

Como vien siendo habitual, el socialista emplegó les redes sociales pa interactuar con usuarios y comentar dellos asuntos o decisiones. Nesti casu foi a partir d’un tweet del periodista Damián Barreiro enllazando la noticia d’Asturies.com qu’informaba sobre la decisión de la organización del Interceltique de conceder a Asturies l’honor de ser el país protagonista na edición del 2022 del festival.

“Nel 2022 vamos ver en Lorient al presidente del Principáu xunto col ministru de Cultura francés mentes que n'Asturies yá va tar la reforma del Estatutu en marcha”, espresaba Barreiro nun exerciciu de política ficción, recibiendo la respuesta de Barbón, que yá retuitara la nuesa información en redes, con un “allí taré”. Sería asina la primer vegada qu’un presidente d’Asturies desplazara a Breizh pa conocer la dimensión d’un festival que coloca a Asturies nel mundu, sobre manera nes naciones celtes y naquellos países con territorios con un importante raigañu celta, como Canadá o Australia.

Na última ocasión na que l’Interceltique celebró l’Añu d’Asturies, nel 2013, el representante institucional del Gobiernu n’An Oriant foi Alejandro Calvo, viceconseyeru de Cultura naquel momentu. Taba como conseyera d'Educación, Cultura y Deporte Ana González Rodríguez, actual alcaldesa de Xixón.

Sábadu con protagonismu asturianu

La cincuentena edición del festival encara’l so tramu final depués de 7 díes de conciertos y actividaes. Mañana Asturies va torna a tener protagonismu cola participación de Muga y Felpeyu en dos conciertos nel Scène Bretagne.

El tríu astrubretón va tocar a les 14 hores xunto con Zoñj y Lune Bleue Trio, mentes que l’históricu grupu folk va facelo a les 20 hores con Les Vrillés y el dúu Chaveul/Noguet, que convida pa la ocasión a Roland Coq.

Na semeya superior, ambiente de cai nesta edición del Festival Interceltique de Lorient.