Augusto Pinochet morrió ensin ser xulgáu polos crímenes de la so dictadura

Ayeri morrió a los 91 años Augusto Pinochet, dictador de Chile ente los años 1973 y 1990. El ex -dictador, que s'alcontraba metíu nun revesosu procesu xudicial p'apautar la so responsabilidá por crímenes contra los derechos humanos y por delitos financieros, morrió víctima d'un infartu a les 2 de la tarde hora chilena dempués d'una selmana ingresáu nel hospital militar de Santiago.

Nacíu en Valparaíso (Chile) el 25 de payares de 1915, Pinochet ingresó con 18 años na Escuela Militar y, tres d'una llarga carrera militar, llegó a xefe interín del exércitu al pasar el priuncipal responsable miltar Carlos prats a exercer de ministru. Confirmáu xefe del exércitu n'agostu de 1973, Pinochet entamó 18 díes más tarde, el 11 de setiembre, un güelpe d'estáu sangrín nel que derrocó al presidente Salvador Allende y col qu'entamó una dictadura que foi exempplu pa otros gobiernos totalitarios de la so contornada pola so falta de respetu a los derechos humanos y pola política d'eliminación física de los sos opositores. Nel añu 1980 Pinochet aprobó una constituciónb que concentraba tolos poderes del estáu na so persona. Un referéndum convocáu nel 1988 en medio d'un clima de protestes contra'l so gobiernu confirmó la voluntá del pueblu chilenu de que Pinochet dexare'l poder. Nel 1989 convocáronse elecciones democrátiques, que ganó Patricio Ailwyn. Pinochet dexaba'l poder políticu pero siguió al mandu de les fuerces armaes y diose la categoría de senador de por vida no que se conoció como la "democracia tutelada" y que duró hasta l'añu 1998. N'ochobre d'aquel añu, el xuez español Baltasar Garzón punxo un pleitu contra Pinochet polos crímenes cometíos nel so mandatu, llogrando la detención en Londres del ex - dictador a lo llargo de 503 díes que supunxeron l'entamu d'una riestra de demandes d'estradición y denuncies dientro y fuera de Chile, casu de les demandes que llegaron dende Arxentina pol asesinatu nel exiliu del xeneral Prats, lleal a Salvador Allende. Les evidencies del informe Rettig de 1991, que conseña la existencia de 3.197 víctimes de la so dictadura amestáronse nos últimos meses al conocimientu de les millonaries cuentes de bancu que Pinochet tenía n'entidaes estranxeres, destapando una trama d'arrequecimientu illegal que dañó la credibilidá del xeneral ente dellos de los grupos sociales chilenos que lu defendíen.

El gobiernu chilenu negóse a da-y a Pinochet un funeral d'estáu por causa de los numberosos procesos xudiciales que tien entamaos, pero l'ex - dictador sí va tener un intierru militar. En conociéndose la so muerte, les manifestaciones contraries al dictador entamaron de manera espontánea per tol país, rescamplando la que se celebró en Santiago y que disolvió la policía cuando la marcha s'allegaba a La Moneda, sede del gobiernu chilenu y símbolu de la resistencia del presidente democráticu Salvador Allende al güelpe d'estáu. Los partidarios de Pinochet aconceyaron mayoritariamente a la puerta del hospital militar.
Más información:
Comunicáu oficial anunciando la muerte de Pinochet, Informe sobre los desapaecíos na dictadura chilena, Fundación Pinochet, Fundación Salvador Allende, Web sobre Salvador Allende.
Prensa de Chile: El Mercurio, La Tercera , La Nación La Cuarta