Asturies sumó 323 positivos na selmana última, 46 diarios

Nos sietes díes anteriores la media foi de 39.

Los datos de positivos de COVID-19 n'Asturies dispárense. Na selmana última rexistráronse un total de 323 casos nuevos, de los que 200 se detectaron namái nos trés díes últimos.

El llunes pasáu había 3.354 casos, mentes qu'ayeri se zarró la xornada con 3.677. La media ye de 46 contaxos diarios nesta selmana.

El focu mayor son los trés chigres d'Avilés, biltu qu'acumula 42 afeutaos, con 1.400 pruebes PCR feches a los veceros y contautos direutos de los casos venceyaos a estos establecimientos.

Dos muertes y aumentu de les hospitalizaciones

Esti vienres el país tornó a llamentar perdes humanes cola enfermedá causada pol coronavirus SARS-CoV-2, dalgo que nun asocedía dende'l día 23. Dende que principió l'andanciu finaron un total de 343 persones.

No que respeuta a les hospitalizaciones, hai anguaño 7 pacientes na UCI, 2 más que'l xueves, y 36 en planta, lo que supón 8 ingresos dende la comunicación última de la Conseyería de Salú.

Na semeya, dos profesionales trabayen nun cribáu fechu nel oriente.