Detéctense dos biltos en residencies de Xixón con positivos de trabayadores non asistenciales

El xueves rexistráronse 44 casos nuevos de COVID-19 nel país, 5 menos que'l miércoles.

El Servicio de Vixilancia Epidemiolóxica de la Conseyería de Salud comunicó güei biltos nes residencias Aurora Álvarez y Clara Ferrer, de Xixón, con ún y dos positivos, de manera respeutiva, tres un cribáu periódicu del Serviciu de Salú del Principáu d'Asturies (SESPA) a los profesionales d'estos centros sociosanitarios. Hai que destacar que los afeutaos son trabayadores non asistenciales, esto ye, que no dan asistencia direuta a los internos d'estos centros.

Otra manera, descubrióse otru casu de COVID-19 nel Centro Gerontológico de Montevil, tamién en Xixón, na repetición de les pruebes.Trátase d'un residente al que treslladaron al Centru pa Persones con Discapacidaes Neurolóxiques de Llangréu (Credine).

15 más nel brotu d'Avilés

Na xornada d'ayeri detectáronse 44 positivos, que ponen el total de la serie en 3.477. D'ellos, hai dos trabayadores del Centro de Educación Especial Don Orione, en Posada.

El biltu d'Avilés suma, mentes, 15 casos nuevos, polo que yá son 33 les persones venceyaes a los chigres Valsa, Piol y Don Pelayo del barriu La Madalena afeutaes. 1.405 veceros o contautos estrechos de los positivos apuntáronse pa facer la prueba PCR tres el llamamientu de Salú, de los que 430 pasaron ayeri pel autocovid, con otros 450 citaos pa güei.

No que respeuta a los hospitalizaos, hai agora 5 pacientes na UCI, ún más que'l miércoles; y 28 en planta, tamién un más que'l día anterior.