Asturies rexistró 39 contaxos diarios na selmana última

En 7 díes detectáronse 273 positivos.

Asturies ta viviendo los díes con mayor tresmisión del coronavirus SARS-CoV-2 na 'normalidá nueva'. Na selmana última rexistró una media de 39 contaxos diarios, siendo'l llunes, con 53 casos nuevos de COVID-19, la xornada cola cifra más alta.

Esta fin de selmana la Conseyería de Salú notificó 44 el vienres, 31 el sábadu y 27 el domingu, que ponen el total de la serie en 3.321. Ente ellos hai 3 positivos de profesionales del Serviciu d'Oncoloxía Radioterápica del Hospital Universitariu Central d'Asturies (HUCA), lo qu'obligó a facer PCR a 24 pacientes, toes negatives.

Dos ingresaos más na UCI

No que respeuta a los ingresos, hai dos pacientes más na UCI, lo que dexa'l total en 4. En planta sigue habiendo 13.

Otra manera, nos trés díes últimos 42 afectaos pola COVID-19 recibieron l'alta epidemiolóxica, lo que dexa'l total de curaciones en 2.194. Hasta'l momentu 341 persones perdieron la vida cola enfermerdá causada pol coronavirus SARS-CoV-2, la última'l día 23.