Asturies preséntase nel Festival Interceltique de Lorient con una delegación “que va xugar un papel importante”

“Depués d’un añu mui potente, intentamos caltener el nivel”, apunta Iñaki Santianes, responsable de la delegación asturiana nel Festival Interceltique de Lorient. La Banda Gaites Camin de Fierro, L-R y La Banda Latira!, xunto col fotógrafu y cienasta Pablo Casanueva, son les últimes incorporaciones al grupu d’artistes del país “que va xugar un papel importante” n’An Oriant dende esti vienres al domingu 13.

Del Année de les Asturies al Année de l’Irlande. Éire ye esti añu la nación protagonista del Interceltique, que cumple la so cincuentena segunda edición, pero Asturies va dar muncho que falar nestos díes de festival.

Nun ye nada soprendente que’l nuesu país presente nel Interceltique más importante del mundu, un certame que l’añu pasáu contó con 900.000 visitantes, récor históricu, una destacada amuesa de la siempre escelente producción musical de raigañu celta. Y esti añu nun va ser menos: “Depués d’un añu mui potente, intentamos caltener el nivel”, señala Santianes, que valora que “va una delegación potente y numberosa que va xugar un papel importante”.

La debutante Banda de Gaites de Castrillón y el Grupu de Baille Tradicional Fitoria, que repite precisamente n’otru añu d’Éire, llegaron pela mañana depués d’una nueche n’autocar contra An Oriant y yá ensayen la so puesta n’escena nel espectáculu Horizons Celtiques (mañana, domingu, martes, miércoles y xueves a les 21.30 nel Stade du Moustoir). Tamién van desfilar na mañana del domingu na multitudinaria Grande Parade des Nations Celtes y actuar el martes a les 14.30 nel Espace Jean-Pierre Pichard na estaya Musique et Danses des Pays Celtes xunto colos galeses Only Boys Aloud y los córnicos Kekezza, nel casu de los de Piedrasblancas, y mañana en compañía de los australianos The City of Melbourne Highland Pipe Band, los gallegos Grupo de Baile A Ponte Vella y los escoceses Interceltic Scottish Pipe Band, nel de los uvieínos, qu’amás van participar nunos talleres de baille asturianu programaos pal vienres a les 16 hores na Salle Carnot.

El debut asturianu nesta edición del Interceltique va protagonizalu Daniel Meré mañana a les 10 hores nuna clase maestra de gaita a les 10 hores en Le Palais col gallegu Ismael García. Esi mesmu día, a les 14.30 hores, va tener llugar el XXXVI Trophée Mac Crimmon de Gaita, nel qu’Asturies va tar representada por Nel Cortizo, Diego Lobo, Jaime Álvarez y Paula Gutiérrez.

Escenariu na Place des Pays Celtes

El domingu nel renováu espaciu Place des Pays Celtes la Banda Gaites Camín de Fierro va presentar el so espectáculu ‘Rock & Fierro’. Va ser nuna xornada qu’arranca a les 18 hores con un programa qu’inclúi previamente a los maneses Boghnid y a los galeses Mari Mathias y AVANC, pa pesllar con los irlandeses Gluais y los gallegos Ailá.

Algaire, ganadores l’añu pasáu Trophée Loïc Raison de talentos nuevos, va tar el martes 8 nel xuvenil Le Kleub dende les 21.30 hores colos escoceses Kinnaris Quintet y los bretones Djs Celtes y el miércoles dende les 20.30 hores na Place des Pays Celtes en compañía de los galeses Vrï, los australianos Austral y los bretones Talea, mentes que’l miércoles va ser el turnu de José Manuel Tejedor na Quai de la Bretagne dientro del ciclu La Bretagne Invite compartiendo escenariu colos llocales Spontus y Le Bour/Bodros tamién a les 21.30 hores, anque va estrenase un día enantes, el martes a les 11.30 hores na Place des Pays Celtes nuna cita con la irlandesa Maire Ní Choilm y los sos paisanos Gluais, los galeses Only Boys Aloud y les dances escoceses de Fiona Campbell. El gaiteru va participar tamién el vienres nel segundu Celtic Odyssée (21.30 hores, Espace Jean-Pierre Pichard) xunto con Rubén Bada al bouzouki y otros munchos músicos de toles naciones celtes.

Les otres dos incorporaciones últimes a la programación del festival, La Banda Latira! y L-R van tocar n’horariu de mañana na Place des Pays Celtes. Los primeros van facelo’l miércoles a les 14 hores y el dúu que conformen Leticia Baselgas y Bada’l domingu les 11.30 xunto cola banda internacional Fourth Moon.

Otra manera, el cineasta Pablo Casanueva lleva a An Orient la so esposición ‘Xente’, que percorrió Asturies nel añu últimu. Ésta va poder visitase xunto a la obra d’otros artistes na iniciativa Euro Celtic Art na sala d’esposición del Hôtel Gabriel dende mañana hasta’l vienres n’horariu de 14 a 18 hores.

Sofitu institucional

“El públicu bretón va alcontrar una puesta d’escena novedosa nel espectáculu de la Banda de Gaites Camín de Fierro ‘Rock & Fierro’; va poder ver otra vuelta a Algaire depués del ésitu del añu pasáu; el dominiu de la gaita de José Manuel Tejedor; la motivación de la Banda de Gaites de Castrillón por ser la so primer vez equí; a una banda que repite como Fitoria...”, enumera Santianes, que nun dulda de la buelga que va dexar la totalidá de la delegación asturiana n’An Oriant. Tampoco del ésitu d’una edición “con espeutatives mui altes al tener Irlanda un tirón brutal” al tiempu qu’adelanta que trés espectáculos yá tien toles entraes vendíes.

Nun va haber representación institucional en Breizh nesta ocasión nun añu de transición nel Gobiernu. L’apoyu, sicasí, “ye total, con una gran implicación dende Turismu y Cultura. Interésense de continuu y esperamos col equipu nuevu igual rellación. El cambiu de talante foi brutal”.

Na semeya, ambiente na parte comercial del festival a primer hora de la tarde.