Jaime Álvarez Fernández trai p’Asturies el so segundu Mac Crimmon, “el mayor premiu al que pue optar un gaiteru”

Nel 2017 convirtióse, con 16 años, nel más mozu en ganar el Trophée Mac Crimmon del Festival Interceltique de Lorient y seis años depués repite victoria. Jaime Álvarez Fernández trai a Asturies una edición más “el mayor premiu al que pue optar un gaiteru”, espresa’l de La Fresneda, intérprete más valoráu d’una edición que tuvo un altu nivel.

La delegación asturiana consigue per segundu añu siguíu’l Trophée Mac Crimmon y acumula ocho victories nes nueve ediciones últimes, racha qu’arrancó nel 2013 –nel 2020 y 2021 nun se celebró por cuenta de la pandemia de COVID-19– con Jesús Fernández González, al que-y siguiría precisamente l’hermanu de Jaime, Álvaro Álvarez Fernández, vencedor del 2014 y 2015. Namái nel 2019 María López Carballo, que quitó’l récor a Jaime como’l más mozu en llevalu al facelo con 14 años, dio’l trunfu a Galicia nesti periodu.

Son cuatro gaiteros de cada país los que participen nel troféu que tien llugar el primer sábadu del festival. Caún interpreta pieces asturianes, gallegues y bretones, y el xuráu conformáu por representantes de los trés territorios puntúa les actuaciones.

Iñaki Santianes, responsable de la delegación y xunto con Daniel Meré miembru del xuráu asturianu, comentó que “foi un concursu superigualáu, de los que más de los últimos años”. “Nun había un claru favoritu y cualquier cosa podía pasar”, añadió al tiempu que rescampló que “el nivel foi mui altu, como pudo valorar el xuráu y el públicu”.

Quinta participación

Álvarez Fernández na so quinta participación nel Mac Crimmon, con victoria nel 2017 y un segundu puestu l’añu pasáu, resultaría’l ganador sobre’l gallegu Rafael Carracedo, que fora terceru precisamente nesi 2017. En tercera posición quedó’l tamién asturianu Diego Lobo, mentes que pal país vecín foi la cuarta y quinta, pa Diego Prieto y López Carballo, quedando empataos como sestos Paula Gutiérrez y Nel Cortizo xunto col gallegu Jorge Castelo.

“Siempre ye una allegría poder tocar nel Mac Crimmon y más poder ganalu per segunda vez”, respuende’l músicu de La Fresneda a Asturies.com mientres disfruta d’unes merecíes vacaciones cola familia per Francia. Álvarez Fernández considera qu’esti troféu, que acumula 36 ediciones, ye “el mayor premiu al que pue optar un gaiteru n’Asturies” y apunta “que tolos años el nivel ye mui altu y yá clasificase ye meritorio”.

Na semeya, Stuart Liddell, reconocíu gaiteru escocés que ganó'l XLI Trophée Mac Crimmon pour Solistes de Highland Bagpipe/Grande Cornamuse, y Álvarez Fernández colos respeutivos trofeos.