Les gaites y el baille asturianu animen los primeros díes del Interceltique de Lorient

La Banda de Gaites Castrillón y el Grupu de Baille Tradicional Fitoria presten al públicu nel Horizons Celtiques. Camín de Fierro desfiló na Grande Parade des Nations Celtes.

La primer fin de selmana del LII Festival Interceltique de Lorient, dedicáu esti añu a Éire, foi un ésitu d'asistencia. Miles de persones pudieron presenciar les actuaciones de les agrupaciones participantes, entes les que rescamplaro les trés asturianes desplazaes.

Castrillón y Fitoria protagonicen la parte asturiana del Horizons Celtiques, el gran espectáculu nel que tán representaes toles naciones celtes que tien como sede'l campu de fútbol llocal, llar del FC Lorient. El sábadu foi la primera de les cinco sesiones y nun pasó desapercibíu'l llabor desendolcáu por estes dos formaciones, que repitieron ayeri y van xubir otra vuelta al espaciu escénicu instaláu nel prau mañana, pasao y el xueves: "Dexaron el pabellón mui alto", resume Iñaki Santianes, responsable de la delegación asturiana.

Les dos agrupaciones, que tamién faen animación de cai, foron les representantes d'Asturies xunto a la Banda de Gaites Camín de Fierro nel Grande Parade des Nations Celtes celebráu na mañana d'ayeri n'An Oriant "hasta la bandera", apunta Santianes. Pela nueche la formación de Proaza, Teberga y Santo Adriano actuó na Place des Pays Celtes pa presentar el so show 'Rock & Fierro" énte munchu públicu.

Y ye que l'escenariu instaláu nesti espaciu renováu del festival ta atrayendo a munches persones pa presenciar les diferentes actuaciones, con un gran ambiente. Nel llugar tien Asturies el so puestu, con información turística y una tienda de productos del país baxo la marca de garantía 'Alimentos del Paraíso Natural', y nel chigre común, onde hai cerveces de toles naciones celtes, pue consumise la producida pola llangreana Asturias Brewing Company.

Debut d'Algaire y de José Manuel Tejedor

Mañana van debutar nesta edición del Interceltique la formación del gaiteru José Manuel Tejedor y Algaire. L'avilesín va facelo a les a les 11.30 hores na Place des Pays Celtes nuna cita con la irlandesa Maire Ní Choilm y los sos paisanos Gluais, los galeses Only Boys Aloud y les dances escoceses de Fiona Campbell, mentes que les mierenses va actuar nel xuvenil Le Kleub dende les 21.30 hroes colos escoceses Kinnaris Quintet y los bretones Djs Celtes.

Tamién ta prevista una intervención nueva, a les 14.30 hores nel Espace Jean-Pierre Pichard na estaya Musique et Danses des Pays Celtes, nesta ocasión xunto colos galeses Only Boys Aloud y los córnicos Kekezza, de la Banda de Gaites Castrillón.

Na semeya, un momentu de l'actuación asturiana nel Horizons Celtiques.