Asturies da un pasu más contra la pandemia: pieslle de la hostelería y de les actividaes comerciales non esenciales

“Ye vital restrinxir la movilidá”, aseguró Adrián Barbón na comperecencia convocada a última hora esti llunes p’anunciar midíes nueves pa controlar pla pandemia. El presidente anunció’l pieslle, dende’l miércoles, “d’una parte mayoritaria de les actividaes económiques qu’esisten na comunidá autónoma”, ente elles la hostelería, y entruga a España por un confinamientu domiciliariu.

“El crecimientu de les hospitalizaciones ye’l nuesu mayor esmolecimientu. Tán entrando ente 10 y 12 caos UCI diarios y, de siguir a esti ritmu, la situación va ser límite. Hai qu’evitar el colapsu sanitariu”, principió’l socialista na so intervención tres l’aconceyamientu del Comité de Crisis COVID-19. A estes cifres hai que sumar l’aumentu de la incidencia acumulada nel país nos 14 díes últimos xube yá a 421 casos por 100.000 habitantes, con Xixón algamando los 756.

D’esta forma, Asturies va pesllar el miércoles “una parte mayoritaria de les actividaes económiques qu’esisten na comunidá autónoma”, midida destinada principalmente a la hostelería. Esti pasu va llevar tamién al adelantu del toque de queda de les 00 a les 22 hores.

Los detalles concretos van espublizase nel decretu que se va asoleyar mañana. Otra manera, l’actividá escolar va siguir con normalidá.

Permisu al Gobiernu d’España

Na so intervención Barbón treslladó tamién el so deséu d’establecer un confinamientu domiciliariu per 15 díes. Sicasí, Asturies nun tien competencia pa ello, polo que va tener que solicitalo a Madrid.

Na imaxe, Barbón de camín al aconceyamientu del Comité de Crisis COVID-19. Semeya modificada a partir d'una fotografía d'Armando Álvarez.