Asturies caltién el toque de queda y el confinamientu perimetral del país

Esti llunes entra a valir la prórroga del estáu d’alarma aprobada pol Congresu, que se va allargar hasta’l 9 de mayu, con una revisión en marzu. El Gobiernu d’Asturies caltién el toque de queda y el zarru del país hasta avisu nuevu, mentes que los confinamientos perimetrales de Xixón, Uviéu y Avilés siguen, en principio, hasta’l miércoles viniente tres l'ampliación de la selmana pasada.

Dende güei l’aplicación o non del toque de queda queda en decisión única de les comunidaes autónomes. Asturies va caltenelu nel mesmu horariu que dende’l miércoles, de 10 a 6 hores, pa tratar de frenar l’espardimientu del coronavirus SARS-CoV-2.

Esta midida va siguir hasta que’l Gobiernu decida revocala, al igual que’l zarru del país. Nun ye’l casu del confinamientu perimetral de los trés conceyos de más población del país, que tien fecha llende, el 18 de payares, anque nun ye descartable que se torne a prorrogar.

Midíes actuales

El decretu 27/2020, espublizáu nel BOPA’l 26 d’ochobre, ye’l qu’anguaño ta en vigor, sacantes el cambiu del horariu del toque de queda. Amás de les midíes vixentes yá citae hai qu’añadir como más destacaes el tope de 6 persones nos axuntamientos y de 15 y 25, n’espacios interiores y esteriores, de manera respeutiva, en llugares de cultu, entierros y velorios.

Otra manera, dende’l miércoles pasáu toles actividaes económiques non esenciales, como la hostelería, tán pesllaes. Esta selmana’l Gobiernu va revisar esta decisión, cola posibilidá de permitir l’apertura del pequeñu comerciu.

Na semeya, el conseyeru de Salú, Pablo Ignacio Fernández Muñiz, esta mañana nuna entrevista en direuto pa 'TPA Noticias Matinal', nel que calcó na necesidá de qu'asturianes y asturianos s'autoconfinen dada la situación sanitaria.