Muebleríes y concesionarios reabren les sos puertes

El Gobiernu permite l'actividá d'estos comercios y llevanta los zarros perimetrales de Xixón, Uviéu, Avilés y la cuenca del Nalón.

El BOPA espublizó na tarde d'ayeri les modificaciones de la resolución del 3 de payares que peslló la hostelería y l'actividá comercial non esencial que finaba ayeri. Si'l miércoles pasáu permitióse la reapertura del pequeñu comerciu y la venta de productos consideraos non esenciales en mercaos al aire llibre, dende güei les muebleríes, "tanto de vivienda como empresarial", y los concesionarios d'automoción pueden facelo "con independencia de la superficie d'esposición y venta al públicu y siempre cola utilización de cita previa".

Tamién hai cambios no que respeuta a la práutica deportiva, permitiéndose l'actividá n'instalaciones al aire llibre de forma individual o por pareyes simples o dobles, n'especialidaes o modalidaes asina prauticaes. La cita previa tamién va ser necesaria.

Siguen pesllaes la hostelería, los comercios de superficies mayores de 300 metros cuadraos y los ximnasios, y la prohibición d'entamar actividaes culturales en direuto. El miércoles el Gobiernu va revisar la situación epidemiolóxica pa reevaluar estes restricciones entá actives, que se van prorrogar 15 díes, hasta'l 18.

Movilidá per tol país

Güei tamién se llevantaron los zarros perimetrales en Xixón, Uviéu, Avilés, Llaviana, Samartín del Rei Aurelio y Llangréu. Nos trés primeros conceyos taben vixentes dende'l 24 d'ochobre, mentes que nos restantes entraron a valir el 21 de payares.

Esta decisión vien pol ameyoramientu de la situación epidemiolóxica nel país, anque'l presidente Adrián Barbón señaló ayeri qu'esta midida nun tuvo l'efeutu esperáu.