Illa confirma’l pase d’Asturies a la fase 2 de la desescalada

El llunes Asturies va pasar a la fase 2 de la desescalada, cuando nun va haber franxes horaries a esceición de les concretes pa los grupos de riesgu. El ministru de Sanidá, Salvador Illa, confirmó esti avance del país esti vienres xunto col d’otros territorios, cola novedá de que yá nun queda nenguna comunidá autónoma en fase 0.

El principal cambiu va tar na eliminación de les franxes horaries y les restricciones de distancies y persones, lo que va permitir salir a la cai a les families al completu, caltiénendose namái les de 10 a 12 hores y de 19 a 20 hores pa los mayores de 70. Los chigres van poder abrir, anque ensin ocupar les barres y con llende d’aforu, asina como los cines y teatros a un 30 por cientu, y los centros comerciales van recuperar actividá.

Xunto con Asturies dan el pasu a la fase 2 Galicia, Cantabria, Extremadura, La Rioja, Euskadi, Navarra, Aragón, Murcia, Ceuta, Melilla, dalgunes provincies d’Andalucía (Almería, Córdoba, Cádiz, Huelva, Jaén y Sevilla) y Castilla-La Mancha (Guadalajara y Cuenca), y trés zones sanitaries de Catalunya. A estos territorios hai que sumar les Illes Balears y Canarias, que contaben con islles que yá taben dende’l llunes nesta etapa del procesu.

Los conceyos de menos de 10.001 habitantes, dende güei ensin franxes

El Ministeriu de Sanidá decidió ayeri flexibilizar delles restricciones pola emerxencia sanitaria provocada pola COVID-19 que beneficien a los conceyos pequeños. Asina, los que tengan menos de 10.001 habitantes y una densidá de población inferior a 100 habitantes por quilómetru cuadráu yá nun cuenten dende güei con franxes horaries, dalgo de lo que podrán disfrutar dende’l llunes aquellos términos municipales de territorios en fase 2, casu d’Asturies.