Asturies entra na fase 1

Esti llunes Asturies dio un pasu más na fase de desescalada entamada dientro del estáu d'alarma pola pandemia de COVID-19. Tol territoriu, tres el refugu del Gobiernu estatal de conceder la fase 2 a los conceyos d’Os Ozcos y los Valles del Trubia asina como dalgunos de los que faen llende, entró na fase 1 que permite, por exemplu, l’apertura de terraces o'l movimientu pel tol país.

Foron munches les asturianes y asturianos que dende primer hora aprovecharon l’amenorgamientu de les resticciones p’acudir a los establecimientos hosteleros. Éstos pueden abrir dende güei les terraces con un 50 por cientu del aforu que teníen afitáu l’añu pasáu, lo que llevó a una gran mayoría d’ellos a esperar a la fase 2 pa retomar l’actividá depués de cuasi dos meses cola persiana baxada al nun considerar rentable retomar l’actividá.

La otra gran novedá ye la posibilidá de dar el saltu del conceyu y desplazase per tol territoriu nacional, cola opción de dir a la segunda vivienda. El pequeñu comerciu yá torna a operar, ensin falta de cita previa, y permítense les xuntances de familiares o amigos, en un númberu nunca mayor de 10 y respetando les distancies de seguridá y les normes d’hixene.

Nesta fase, mentes, caltiénense les franxes horaries por edaes pa la práutica de deporte, asina como pa facer paseos o salir cola reciella.

Biblioteques y museos, abiertos

Les biblioteques y los museos van abrise tamién, asina como los llugares de cultu relixosu. Los mercaos al aire llibre van tornar naquellos llugares nos que lo solicite’l Conceyu y los hoteles van poder acoyer veceros, que nun van poder facer usu de les zones comunes.

La fase 2, si la evolución de la pandemia de COVID-19 sigue siendo bona, entrará n’Asturies el martes 26 de mayu. Será la tercera de les cuatro programaes pol Ministeriu de Sanidá pa llegar a la “normalidá nueva”.

Na semeya, veceros esta mañana a primer hora nuna terraza en Los Campinos, Xixón.