Asturies baxó la selmana pasada’l númberu de casos nuevos diarios per primer vegada na segunda fola

Nos siete díes últimos Asturies rexistró una media de 344 casos nuevos diarios, cuando na pasada foi de 508. Ye la primer vegada de la segunda fola na que los datos de contaxos de SARS-CoV-2 baxen con respeuto a la selmana anterior, frenando una tendencia qu’amenazaba con colapsar el sistema hospitalariu.

Esta fin de selmana los datos de la COVID-19 dexaron 907 positivos según los avances de la Conseyería de Salú: 348 el vienres, 310 el sábadu y 249 el domingu. D’esta forma’l total de casos confirmaos algama la cifra de 21.543 –qu'asciende nos datos oficiales a 21.569 al incoporar positivos díes anteriores–, 2.408 más qu’hai una selmana, cuando había 19.135.

Son cantidaes entovía altes, lloñe de ser les desaes, anque menores a les qu’en feches previes prendieron toles alarmes. Asina, veníamos de 408 y 508 casos nuevos diarios de media, cantidá que se rebaxa agora a 344, frayando una tendencia ascendente dende qu’entamó la primer fola.

Dende qu’Asturies.com principió a contabilizar esti datu, ésta foi la evolución: 39, 46, 52, 83, 92, 92, 150, 210, 272, 334, 408 y 508, hasta los 344 d’anguaño.

La tasa de positividá baxa al 6 por cientu

Esta fin de selmana la tasa de positividá diaria asitióse al rodiu del 6 por cientu cuando'l miércoles foi del 7,09. En concreto, el vienres baxó al 5,45 por cientu tres el 5,49 del xueves; el sábadu quedó en 5,79 por cientu y ayeri, en 6,2 por cientu.

No que respeuta a les muertes, hai que llamentar un total de 54 estes xornaes: 20, 22 y 12, de manera respeutiva. Dende que principió l'andaciu finaron un total de 859 persones cola enfermedá causada pol coronavirus SARS-CoV-2, incorporando a esa cantidá 3 muertes nos díes previos al xueves que nun taben contabilizaos.

Nestos momentos hai hospitalizaes 870 pacientes ingresaos con confirmación o sospecha de COVID-19, 29 más que'l xueves, a los qu'hai que sumar otros 140 na UCI, 3 menos.

Na semeya, el conseyeru de Salú, Pablo Ignacio Fernández Muñiz, amuesa'l vienres una gráfica cola incidencia acumulada en toles autonomíes.