Los 27 finaos del llunes convierten la xornada na más prieta del andanciu

Tornen a baxar los contaxos, 221, con una tasa de positividá del 6,31 por cientu.

Asturies vivió ayeri la xornada más prieta de tol andanciu, al rexistrar 27 finaos –los datos oficiales sumen 26 al eliminar ún incluyíu na comunicación de Salú d'ayeri–, superando los 25 del domingu 15 y del xueves pasáu. Son 16 homes de 96, 95, 93, 90, 86, 86, 86, 77, 76, 76, 75, 75, 71, 70, 64 y 63 años, y 11 muyeres de 97, 90, 90, 90, 89, 88, 85, 85, 84, 83 y 70, de los que 13 teníen residencia nun centru de mayores.

En total, dende qu'entamó l'andanciu, 885 persones perdieron la vida cola COVID-19. Hasta'l 24 d'ochobre finaran 408 persones, polo que nel últimu mes diéronse tantes muertes como en tola primer fola y parte de la segunda.

No que respeuta a los casos nuevos, detectáronse 221 –los datos oficiales auméntalos a 231 al incorporar 10 de díes anteriores–, 28 menos qu'ayeri, cuando la tasa de positividá asitióse nun 6,2 por cientu. Güei ye del 6,3 por cientu tres la realización de 4.789 pruebes PCR.

Hai hospitalizaes 846 persones con confirmación o sospecha de la enfermedá causada pol coronavirus SARS-CoV-2, 24 menos qu'ayeri, a los qu'hai que sumar 144 que tán na UCI, 4 más.

Llamamientu pa participa nos cribaos

Los ciudadanos de 30 a 50 años que residan nes zones incluyíes nos códigos postales 33209 de Xixón, 33011 d'Uviéu y 33401 d'Avilés que residan con mayores de 65 años, nun fixeran una PCR nel mes últimu y nun pasaran la COVID-19, tán llamaos a participar nun cribáu. Les autoridaes sanitaries encamienten-yos a rellenar esti formulariu o a llamar al númberu de teléfonu 984.10.04.00 pa recibir una cita.

Tamién sigue activu pa persones coles mesmes carauterístiques residentes en Casu, Sobrescobiu, Llaviana, Samartín del Rei Aurelio y Llangréu. Hasta la fecha inscribiéronse 3.840 persones.