29 positivos esti domingu nuna selmana na que se rexistró un pequeñu aumentu de contaxos

Ye la cantidá más baxa dende'l 9 de setiembre.

Asturies peslló la selmana cola xornada con menos contaxos del añu. La Conseyería de Salú comunicó 29 positivos, anque nestos 7 díes últimos hebo 373, al pasar de 51.647 –llueu d'una revisión de los datos– a 52.020 –l'actualización suma 1 más–, polos 334 de l'anterior.

Supón 53 casos nuevos diarios de COVID-19 de media, cuando na anterior hebo 49. Dende l'entamó de la tercer fola la evolución foi la siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49 y 53.

Na fin de selmana rexistráronse 138 contaxos: 54 el vienres, 55 el sábadu y 29 ayeri, la cifra más baxa dende'l 9 de setiembre, xornada con 25. Nel 2021 la cantidá más reducida foron los 35 del 9 de mayu.

Les tases de positividá diaria quedaron nun 3,65 por cientu'l vienres, del 3,67 por cientu'l sábadu y del 2,74 por cientu ayeri depués de la realización de 1.572 pruebes de diagnósticu d'infeición activa. Nos dos díes previos fixéronse 2.134 y 1.771, de manera respeutiva.

A 7 díes esti porcentaxe taba'l sábadu, a falta de l'actualización de los datos oficiales de COVID-19, nun 3,06 por cientu –ayeri xubió al 3,07 por cientu–. Supón un aumentu en comparanza col xueves, cuando esti indicador quedara nun 2,98 por cientu.

Dos finaos

El vienres y el sábadu hebo que llamentar una muerte, dos homes de 80 y 84 años. Dende qu'entamó l'andanciu 1.967 persones finaron cola enfermedá causada pol coronavirus SARS-CoV-2.

65 pacientes tán hospitalizaos con confirmación o sospecha de COVID-19, a los qu'hai que sumar otres 37 ingresaes na UCI. Son 2 y 7 más que'l xueves, de manera respeutiva.

Na semeya, una persona recibe la vacuna nel recintu ferial de Santuyano.