Los contaxos nel grupu d'edá de 15 a 25 años dupliquen a los del restu de la población

Salú llamá a la precaución a la mocedá asturiano. 62 casos nuevos esti xueves, xornada na que finó un home de 67 años.

"Estes selmanes últimes, y sobre manera la última, hai un aumentu de casos positivos fundamentalmente nuna franxa d'edá, que va de los 15 a los 25 años", aseguró esta mañana María José Villanueva, coordinadora de Programes COVID. La incidencia acumulada nos 7 díes últimos ta n'Asturies en 35 casos cada 100.000 habitantes, mentes que nesti grupu asciende a 64.

"Duplícase'l númberu de casos y cuando esploramos nel rastrexu ónde se producen esos contaxos, ónde se contrayi la enfermedá, ye fundamentalmente nel ámbitu de rellación social: ociu, ámbitu educativu y prautiques deportives", esplicó darréu la responsable, que llama a "nun cayer na falsa perceición de qu'un mozu nun pue tener un dañu grave o secueles". Poro encamentó a "tomar precauciones al máximu" nos ámbitos de rellación social "hasta que teamos vacunaos toos".

Tasa de positividá diaria del 3,69 por cientu

A falta de la espublización de los datos oficiales de la COVID-19, la Conseyería de Salú informó de la detección ayeri de 62 casos nuevos. Son 15 menos que'l miércoles, anque la tasa de positividá diaria ye mayor, del 3,69 por cientu llueu de 2.333 pruebes de diagnósticu d'infeición activa pol 2,93 por cientu del día anterior, con 2.699 tests.

A 7 díes esti porcentaxe yera nesa xornada del 2,91 por cientu –ayeri xubió al 2,98 por cientu–. La Organización Mundial de la Salú (OMS) marca un 5 por cientu como cifra referencia a partir de la que s'empieza a perder el control de la pandemia.

Hai que llamentar la muerte d'un home de 67 años. Dende qu'entamó l'andanciu hai que llamenta la perda de 1.965 persones cola enfermedá causada pol coronavirus SARS-CoV-2.

63 pacientes tán hospitalizaos con confirmación o sospecha de COVID-19, 3 más que'l miércoles. A ellos hai que sumar los 30 que siguen na UCI.

11 biltos activos

Asturies informó al Ministeriu de Sanidá de la esistencia de 11 biltos activos, 8 menos que la selmana pasada, con un total de 97 casos. 5 d'ellos detectáronse estos 7 díes últimos, comunica la conseyería.