Salú comunica 35 casos, con una tasa de positividá diaria del 2,35 por cientu

Nun hebo que llamentar muerte nenguna.

A falta de la espublización de los datos oficiales de la COVID-19, la Conseyería de Salú comunicó ayeri la detección de 35 casos nuevos. Ye la segunda meyor xornada del añu xunto cola del 9 de mayu, siendo la cifra más baxa rexistrada esti 2021 la del domingu, con 29 contaxos.

El SESPA fixo 2.003 pruebes de diagnósticu d'infeición activa, polo que la tasa de positividá s'asitió nel 2,35 por cientu, cuando la xornada anterior quedó nun 2,74 por cientu. A 7 díes esti porcentaxe yera enantes de l'actualización del 3,07 por cientu –ayeri xubió al 3,09 por cientu–.

Per segunda vez siguida nun se rexistró muerte nenguna cola enfermedá causada pol coronavirus SARS-CoV-2. El total de finaos dende qu'entamó la andanciu caltiénse en 1.967.

Hai 74 pacientes hospitalizaos con confirmación o sospecha de COVID-19, 9 más que'l domingu. A ellos hai que sumar otros 29 que tán na UCI, 8 menos que'l día anterior.