El SESPA va entamar a citar a les persones d'ente 75 y 79 años pa vacunase

La media diaria de contaxos na selmana última quedó en 115, cuando l'anterior foi de 119.

El Serviciu de Salú del Principáu d'Asturies (SESPA) va finar estos díes cola vacunación a les persones mayores de 80 años y va entamar cola citación de los que tengan ente 75 y 79. Éstos van recibir dosis de les vacunes d'ARN mensaxero, Pfizer/BioNTech o Moderna, mentes que la d'AstraZeneca ta alministrándose nesti momentu ente'l grupu d'edá de 56 a 65 años.

Un total de 157.388 persones, el 15,45 por cientu de la población asturiana, recibió polo menos una dosis hasta la fecha, y 94.686 yá tiene la pauta completa, esto ye, un 9,29 por cientu. Del total de vacunes puestes, 207.693 son de Pfizer, 27.706 de AstraZeneca y 16.680 de Moderna.

Diez muertos

El númberu de positivos detectaos nos 7 díes últimos baxó de manera leve al rexistrase 807, lo que supón 23 menos que nes 7 xornaes previes, cuando hebo 830. La selmana entamó con 45.956 casos acumulaos tres la revisión de datos y ayeri esta cantidá yera de 47.763 –l'actualización auméntala en 5 hasta 47.768–.

La baxada de la curva de la tercer fola sigue, sicasí, en situación de meseta. Ésta principó con una media diaria de 78 contaxos, pa siguir con 101, 167, 292, 421, 482, 383, 226, 154, 135, 144, 113, 113, 119 y los actuales 115.

No que respeuta a los díes últimos, festividá de Selmana Santa, la Conseyería de Salú comunicó 135 positivos el miércoles, 93 el xueves, 137 el vienres, 74 el sábadu y 95 el domingu. La tasa de positividá nestes xornaes asitióse nun 5,63 por cientu; 5,14; 7,65; 4,47; y 5,63 por cientu, de manera respeutiva, siendo esti porcentaxe a 7 díes el vienres del 5,69 por cientu –ayeri xubió al 5,78 por cientu–.

Hai que llamentar estos díes la perda de 10 persones cola enfermedá causada pol coronavirus SARS-CoV-2. Dende qu'entamó l'andanciu acumúlense 1.905 muertes.

184 pacientes tán hospitalizaos con confirmación o sospecha de COVID-19, a los qu'hai que sumar los 66 ingresaos na UCI. Son 11 y 5 más que'l martes, de manera respeutiva.

Prórroga en Siero

Salú decidió'l miércoles la prórroga del nivel d'alerta 4+ en Siero per 14 díes más, hasta'l 16 d'abril. Los datos ameyoraron, pero nun se consiguió caltener per 7 xornaes siguíes una incidencia acumulada a 14 díes menor de 325, requisitu indispensable pa salir del riesgu estremu pa los conceyos de más de 30.000 habitantes.

Siero y Llangréu son los dos únicos territorios en zarru perimetral, anque hai dellos que podríen entrar nos díes próximos nel casu de nun ameyorar los sos datos, como Llanes, Mieres o Samartín del Rei Aurelio. Pa consultar los indicadores de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na imaxe, viales de la vacuna Comirnaty de Pfizer que llegaron a Asturies esta mañana.