"Los asturianos inventamos el cachopo", l'exemplu d'innovación que pon el PP

Los populares reparten pelos buzones esta propaganda eleutoral que se centra en "aprovechar y recuperar el talentu d'Asturies".

El Partido Popular (PP) pon como exemplu d'innovación el cachopu. Esti platu relativamente modernu de la cocina asturiana tan de moda anguaño, sobre manera ente turistes, ye emplegáu nuna campaña que pon el centru nel talentu del asturianu.

"Los asturianos inventamos el cachopo", apaez sobre la semeya d'un cachopu y xunto a una bandera d'Asturies, acompañáu polos lemes, tamién en castellanu, 'Aprovechar y recuperar el talentu d'Asturies' y 'Diego Canga, oportunidá de cambiu'. Per detrás, repite la frase y pon más exemplos culinarios como'l requemáu del arroz con lleche, los 'carajitos' del profesor, la tarta xixonesa y los carbayones, pa depués citar el desarrollu d'aplicaciones móviles o innovaciones n'enerxíes renovables.