Tas en Espaciu y Tiempu > La llingua asturiana > L'Asturianu na Rede

L'Asturianu na Rede

Les llingües minoritaries, como ye’l casu del asturianu, tienen que dir ganando terrén día a día nes nueves tecnoloxíes si nun quieren desapaecer y quedar allancaes nel pasáu. Al nun ser llingua oficial y nun cuntar con un sofitu nidiu de les instituciones, la presencia del asturianu na rede depende de les persones qu’a títulu individual faen usu d’él. La sociedá asturiana ye la segunda que más se conecta a internet tres la catalana. Asina, qu’ensin una presencia amañosa de la llingua na rede l’idioma taría condergáu al so desaniciu.

Rescampla l’esitu de los blogues n’asturianu, con un 15% de blogues asturianos fechos nel idioma del país. Páxines onde se fala de temes de toa triba, dende la llingua, a la política, pasando pel deporte o l’humor. Inclús con blogues n’asturianu dedicaos a la pornografía. La propia comunidá de blogueros entamó el añu 2007 la iniciativa “puntu ast”, cola sida de solicita-y al ICAAN, l’organismu encargáu d’asignar los dominios web, un dominiu propiu pa la comunidá llingüística asturiana, a semeyanza del .cat algamáu polos catalanes. Sicasí, la iniciativa, a pesiar de llograr en poques selmanes bien de sofitos de delles estayes, lleva tiempu parada.

Tamién ye reseñable la esistencia de Softastur, una comunidá virtual enfotada en tornar Software Llibre al asturianu, promoviendo y sofitando'l so usu en tolos ámbitos de la sociedá y que yá tien tornáu a la nuesa llingua l’OppenOffice y Ubuntu, sistemes operativos n’asturianu, qu’amás, permiten l’usu de grafías tan asturianes como la che vaqueira o la h aspirada.

La importancia de les nueves tecnoloxíes pa la normalización social d’una llingua, sobremanera nel casu d’un idioma minoritario como’l nuesu, ye tal que la propia Academia de la Llingua Asturiana espublizó un “Cartafueyu Normativu” tituláu  'Terminoloxía d'Internet y d'interfaces pa programes informáticos en Llingua Asturiana', pa dar respuesta a los usuarios asturfalantes de les nueves tecnoloxíes.

Los más de 10.000 artículos de la Wikipedia n´asturianu o la esistencia de dellos medios dixitales n'asturianu, de cuya presencia ye décana Asturies.com, qu'entamó en 1997, son nidia amuesa de la bayura ya importancia de conteníos n'asturianu nel mundu virtual. Una presencia que va enanchando día tres día.