Eleiciones 2015

Les eleiciones a conceyos dexen dellos resultaos positivos pal asturianismu

Los resultaos en dellos conceyos foron positivos pa organizaciones de calter asturianista marcáu. El PAS sumó 3 conceyales en Bimenes con un 23,43 por cientu de los votos, dos representantes más que nel 2011, y Conceyu Abiertu por Noreña suma un segundu edil tres rexistrar un 14,63 por cientu.

La FSA-PSOE pierde seis puntos nes eleiciones que dexen la Xunta Xeneral más fragmentada

Javier Fernández resultó vencedor de les eleiciones n'Asturies pese a sufrir un baxón importante de votos. La FSA-PSOE, col 98,43 por cientu escrutáu, algama 14 diputaos, 3 menos que nel 2012, al sumar un 26,37 por cientu del total de votos (32,10 por cientu nes anteriores). El PP aumenta a 11 escaños y Podemos entra con 9 nun Parllamentu con seis partíos representaos.

Moriyón gana les eleiciones en Xixón

Carmen Moriyón, alcaldesa de Xixón, ganó les municipales. Foro, col 100 por cien escrutáu, suma 8 conceyales, 1 menos que nel 2011, pero'l PSOE pierde 3 pa pasar a tener 7. Xixón Sí Puede, tercer fuercia política con 6 ediles.

Foro desapaez n'Uviéu, onde torna a vencer el PP

El PP ganó otra vuelta n'Uviéu, onde Somos Oviedo entra con fuercia. La candidatura d'Agustín Iglesias Caunedo llogra algamar los 11 ediles que sumó Gabino de Lorenzo nel 2011, mentes que la candidatura avalada por Podemos suma 6. Foro queda fuera de la Casa Conceyu al perder los sos 7 conceyales.

Sigui tolos resultaos na nuesa cuenta de Twitter

Na nuesa cuenta de Twitter @asturies pue siguir tola información d'esta nueche eleutoral. Col 14,56 por cientu escrutáu, los resultaos son los siguientes: FSA-PSOE, 15 escaños; Partido Popular, 11; Podemos, 10; Izquierda Xunida, 5; Foro, 2; y Ciudadanos, 2.

Andecha Astur denuncia la retirada de les sos papeletes en munchos colexos eleutorales por tar en llingua asturiana

Esta mañana retiráronse les papeletes d'Andecha Astur en munchos colexos asturianos por tar en llingua asturiana. La Xunta Eleutoral validara per primer vegada ensin torgues les papeletes n'asturianu de la formación nacionalista, pero non la so distribución. Andecha nun descarta impugnar les eleiciones.

El primer avance de participación ye del 32,89 por cientu, mayor que nes eleiciones anticipaes del 2012 anque menor que nel 2011

Un 32,89 por cientu de los asturianos con derechu a votu yá exercieron el so derechu. Esta cifra ye mayor que nes anticipaes del 2012, cuando a les 14 hores votaren un 29,04 por cientu, anque mayor que nel 2011, cita que na que participaren hasta esi momentu un 34,99 del total.

Especial eleiciones Nacionales y municipales 2015

El domingu, 24 de mayu, celébrense les eleiciones a la Xunta Xeneral y a los conceyos. Asturies.com, como ye tradición, espubliza un especial de cara a esta cita coles urnes con información y entrevistes a dellos candidatos. Na nueche eleutoral informarémos tamién nél de tolos resultaos.

Llamazares: “Nun regreso a la política asturiana pa volver a ser voceru d’un grupu parllamentariu; aspiro a presidir el Gobiernu”

Tres una etapa nel Congresu, Gaspar Llamazares Trigo (Logroño, 1957) torna a la política asturiana pa liderar la candidatura d’Izquierda Xunida nestes eleiciones. Y failo cola intención de propiciar a “un cambiu de rumbu pa sacar a Asturies de la resignación” dende la presidencia del país.

León: “Tamos dispuestos a escuchar, pero nun tamos pol llabor de pautar nada colos responsables del espoliu de la ciudadanía”

Les sensaciones en Podemos son bones. La respuesta de la xente en tolos actos entamaos y “la ilusión” qu’amuesa fai que’l so candidatu Emilio León Suárez (Xixón, 1977) sía optimista de cara al 24-M, cita que considera importante “pa cambiar les nuestres vides”.

Pages