Llamazares: “Nun regreso a la política asturiana pa volver a ser voceru d’un grupu parllamentariu; aspiro a presidir el Gobiernu”

Tres una etapa nel Congresu, Gaspar Llamazares Trigo (Logroño, 1957) torna a la política asturiana pa liderar la candidatura d’Izquierda Xunida nestes eleiciones. Y failo cola intención de propiciar a “un cambiu de rumbu pa sacar a Asturies de la resignación” dende la presidencia del país.

‘Ye tiempu d’izquierda’ ye’l lema que ta utilizando Izquierda Xunida nesta campaña. Sicasí, el votu d’izquierda preséntase más fragmentáu que nunca cola irrupción de Podemos. ¿Por qué Izquierda Xunida ha de ser la opción?

Énte too porque la izquierda ye imprescindible pa liderar el cambiu de rumbu que necesita Asturies. Y nós somos la única fuerza nítidamente d’izquierdes que se presenta a les eleiciones con posibilidaes d’algamar una presencia significativa. Nun somos izquierda d’ocasión. Nun somos ‘roxos’ de campaña eleutoral que llueu se destiñen cuando llegan al gobiernu, nin pretendemos escondenos nel centru del tableru. Nun disimulamos el nuesu compromisu colos valores de la izquierda.

Les encuestes dan una baxada considerable a la so formación. ¿Hai que fiase d’elles?

Va unos pocos meses les encuestes dábennos unes previsiones determinaes, pero les más recientes yá apunten de manera nidia un incrementu sustancial de los apoyos consolidaos a favor de la candidatura d’IX. Atrévome a dicir que vamos ser la opción que más va crecer nesta campaña eleutoral, hasta tal puntu que nun arrenunciamos a nada y aspiramos a liderar la izquierda asturiana que pilote un tiempu nuevu p’Asturies. Proponemos a los asturianos un programa de gobiernu con un equipu pa presidir esi Gobiernu.

¿Tán Izquierda Xunida y Podemos condenaos a entendese?

Nun lo pon fácil Podemos, que recién llegáu al escenariu políticu peca d’ún de los defectos principales de los partíos tradicionales: la soberbia. Nós aspiramos, ensin soberbia, a xenerar diálogu y compromisos plurales, dalgunos d’ellos co tol espectru políticu, en temes esenciales pal futuru d’Asturies. Y queremos liderar tamién un Gobiernu ensin prepotencia y con cultura del alcuerdu. La mayor pluralidá que se dea na Xunta Xeneral del Principáu, reflexu de la pluralidá de la sociedá asturiana, nun ha de ser sinónimu d’inestabilidá y  ingobernabilidá.

¿Qué lu lleva a dexar el so cargu de diputáu nel Congresu pa liderar la candidatura d’Izquierda Xunida n’Asturies?

Preséntome como candidatu a la presidencia d’Asturies porque creo que la nuesa comunidá ta énte un momentu decisivu. Estes eleiciones nun son una más; xugámonos muncho. Necesitamos un cambiu de rumbu pa sacar a Asturies de la resignación. Y ye nesti contestu nel qu’acepté’l llamamientu de munches persones que me pidieron que lidere un proyeutu ambicioso de gobiernu p’Asturies. Nun regreso a la política asturiana pa ser voceru d’un grupu parllamentariu; eso yá lo fui. Di esti pasu porque aspiro a presidir el Gobiernu autonómicu. Toi convencíu de qu’IX tien toles blimes necesaries pa liderar esi cambiu de rumbo dende la presidencia d’Asturies.

¿Cuáles son los cambios más acuaciosos que necesita’l país?

Asturias ta enllena de fortaleces. Niégome a aceptar que teamos condenaos a vivir nuna crisis permanente. Poseemos unos recursos naturales envidiables, una riqueza cultural y llingüística desaprovechada y una tradición industrial, agraria y profesional escelentes, pero nun fuimos quien a poneles en valor suficientemente. Tenemos que tener l’ambición de querer xubir de categoría, como’l Sporting y como l’Uviéu.

Nun soi conformista pero, como dixi, fai falta un cambiu de rumbu. Evidentemente’l desafíu fundamental ye’l de consiguir una economía más áxil, diversificada y sostenible, que dea munches más oportunidaes d’emplegu dignu a los asturianos. Pa ello, ente otres coses, paezme esencial la cooperación ente la Universidá y la empresa pública y privada, repatriar l’inmensu conocimientu acumuláu polos asturianos y asturianes de la diáspora y la emigración y xenerar un modelu territorial nuevu.

Necesitamos esi modelu económicu nuevu pa lluchar de manera eficaz contra la insoportable probeza y contra la desigualdá social; pa defender el nuesu sistema públicu de proteición social y bienestar, amenazáu poles polítiques de recortes y privatizaciones.

¿Va ser gobernable Asturies depués del 24-M?

Tien de selo, pero pa ello debe haber capacidá de liderar el diálogu políticu y l’alcuerdu. Llamentablemente, nun paez que Javier Fernández, responsable de dinamitar les pontes cola izquierda, tenga’l meyor perfil pa ello. Tampoco los actores nuevos, si siguen instalaos na prepotencia. Creo que’l proyeutu d’IX ye l’afayadizu pa lidera esi tipu de diálogu. Por eso aspiro a que sía’l más votáu.

¿Tán abiertos a pautos?

Sí, pero nun m’engaño. Nun creo nos alcuerdos que nun tean basaos en compromisos programáticos. La deriva del PSOE, por exemplo, que más que gobernar paez que foi l’alministrador concursal d’Asturies, tien poco que ver col cambiu de rumbu ambiciones que nosotros plantegamos. Tampoco lo ponen fácil aquellos que se consideren inquisidores de lo que nun acaba de nacer. Sicasí, l’alcuerdu en política ye muncho más que consiguir pautos estables de cogobiernu; importa muncho qu’IX sía’l que lidere a la izquierda asturiana.

¿Ve posible un alcuerdu ente’l PSOE y el PP?

Nun debería sorprendenos; sería la simple continuidá de la realidá política asturiana de los tiempos últimos. Sería malo p’Asturies, que creo que necesita una propuesta de cambio nítidamente d’izquierdes.

¿Qué opinión-y merez l’ascensu de formaciones como Ciudadanos, ensin militancia y presencia n’Asturies?

Ye una propuesta oportunista, con poco posu, qu’aspira a competir cola derecha tradicional pa facese güecu nel centroderecha. El so crecimientu nun servirá pal cambio, sinón p’apuntalar los plantegamientos más neolliberales. Tendríen de tener cuidao con aspirar namái a tar de moda a base de ramalazos populistes, porque yá se sabe que lo que ta de moda esta temporada pue quedar desfasao muy rápidamente.

Izquierda Xunida ye’l partíu parllamentariu que nel so progama presenta una apuesta más nidia pol asturianu, abogando pola so oficialidá y normalización social.

Sí, por desgracia quedamos solos defendiendo la cooficialidá ensin ambigüedaes nin complexos. Nun m’entusiasma, porque creo que debería ser un plantegamientu ampliamente mayoritario dientro les instituciones asturianes, pero nós nesti tema tampoco vamos destiñinos.

¿Sorprendió-y el discursu ambigüu que mostró hasta hai bien poco Podemos nesti asuntu?

Sinceramente, sí. Pensaba que l’apaición d’esti actor político nuevu reforzaría’l frente sociopolíticu a favor, ensin matices, de la cooficialidá de la llingua asturiana. Nun ye una bona noticia la so tebieza. Quiciabes piensen que la indefinición en munchos asuntos sía una bona estratexa pa pañar votos ensin más. Si ye asina, creo que s’equivoquen doblemente.