Convocatories

El viniente 9 de xunu, miércoles, na Sala Conferencies (1º pisu) del Centru de Cultura Antiguu Institutu de Xixón, y a les 19,30 hores, entamará una actividá de la ROLDA 2010 titulada ‘Fútbol y lliteratura’.

Nella participarán l'escritor xixonés Vicente García Oliva y los futbolistes José Antonio Pérez Boudón, José Manuel Espinosa Gómez y Eloy José Olaya Prendes, amás d'Humberto Gonzali (coordinador de L'Arribada). Los asistentes recibirán un exemplar de ‘El pallabreru del fútbol’ qu'editó la Oficina Municipal de la Llingua de Xixón.

Esti sábadu 5 de Xunu, na sala Savoy de Xixón, de magar les 21h, el grupu de punkrock-folk Sambre tará presentando n'esta ciudá los temes del so nuevu trabayu discográficu 'Na Solombra'.

Van tar acompañaos de los músicos de Grau, Misiva, que aprovecharán la ocasión pa adelantanos dellos temes del discu que tan a puertes d'asoleyase. Amás, Movie Jack, dende Uvieu, van traer los sos sonios glam a la nueche xixonesa.

El martes 1 de xunu nel Atenéu de La Calzada, entamen los Alcuentros Nel Arcu Atlanticu, onde caben los distintos elementos de la cultura tradicional asturiana y de tol arcu atánticu.

Esta actividá, organizada pola agrupación Los Xustos, ye una amestadura de mitoloxía, lleendes, rellatos, dances, música ya historia. Cada añu los conteníos y actividaes que desarrollen en cada alcuentru van cambiando y nesta ocación lleven el nome de ‘Ciegu Mendicante’.

Andecha entama la decimotercer edición del ‘Día d’Andecha’, “como día de conmemoración del 25 de mayu y la soberanía de 1808 y esta edición ye más especial entá, porque cellebramos el vixésimu aniversariu de la nuesa formación”.