La XLVI Selmana de les Lletres Asturianes va reconocer a la emigración al traviés de la figura de Xosé Álvarez ‘Pin’

L’escritor de Cigüedres, emigráu a Arxentina y Madrid xunto a la so madre, va ser homenaxáu na próxima edición de la Selmana de les Lletres Asturianes. El Gobiernu pretende con esti reconocimientu al autor fináu nel añu 2001 poner en valor el llabor de la emigración na salvaguarda de les nueses llingües propies y lliteratura.

Dos selmanes depués de la gran celebración de les nueses lletres, que nesta edición tuvo dedicada a Conceyu Bable nel cincuentenu aniversariu de la so fundación, la Conseyería de Cultura, Política Llingüística y Deporte trabaya yá na siguiente. Va tener llugar, como ye vezu, los primeros díes de mayu y va reconocer l’importante papel xugáu pola diáspora asturiana na pervivencia del asturianu y del gallego-asturiano al traviés de la figura de Xosé Álvarez Fernández ‘Pin’, autor del llibru de rellatos ‘Fíos de naide’, asoleyáu en Madrid nel 1981.

La intención ye poner en marcha un ambiciosu programa en collaboración colos centros asturianos “cola fin de reconocer y visibilizar a aquelles persones y iniciatives que caltuvieron viva la cultura asturiana como principal pegollu de la so identidá y qu'asina lo tresmitieron a les siguientes xeneraciones”. “La cultura y la llingua fueron llazos que permitieron abrazar a la patria d'orixe dende la distancia y hermanase con otros semeyantes, al tiempu qu'instituyeron a la emigración asturiana como embaxadora d'Asturies que contaxó la so vital sentimientu d'asturianía a numberoses persones nos diferentes países d'acoyida”, anunciaron esta mañana dende’l Gobiernu.