Xunta Moza y Reciella entamen un cuentacuentos en La Madreña

Carlos Alba ‘Cellero’ va protagonizar un cuentacuentos n’asturianu esti sábadu nel CSOA La Madreña. Xunta Moza y Reciella entamen esta actividá dedicada a neños y neñes hasta 7 años, qu’han de dir acompañaos d’un adultu.

“Dende Xunta Moza compartimos con Reciella la esmolición pola falta d'iniciatives y actividaes pa la xente menudo nes que l'asturianu sía la llingua vehicular de les mesmes”, espresa esti coleutivu nun comunicáu que denuncia’l “procesu d'aculturización al que se ven sometíos los neños y les neñes asturianes cuando s'incorporen a la vida social, empezando mesmamente pol sistema educativu, nel que non solo nun se contempla l'usu normal del idioma nél, sinón qu'amás nin siquier l'asturianu apaez nel currículu d'Educación Infantil”. Amás, recuerda que la TPA “nun emite nin un solo minutu de programación infantil n'asturianu”, lo que la convierte “na única televisión europea d'una comunidá billingüe que nun pon programación pa los más neños nel idioma propiu”.

Nesta actividá conxunta de les mocedaes de la Xunta pola Defensa de la Llingua Asturiana (XDLA) y del coleutivu que nació na seronda col oxetivu de promocionar l’asturianu ente neños y neñes d’edaes tempranes va participar Carlos Alba ‘Cellero’, que va sorprender a los pequeños con delles histories. El cuentacuentos va principiar a les 11.30 hores nel centru social uviedín La Madreña.