Vicente García Oliva
Nacíu en Xixón nel añu 1944, Vicente García Oliva ye ún de los meyores escritores en llingua asturiana d’anguaño. Autor de numberoses obres, de xuru que te suena por ser el responsables de munches histories pa xente mozo, la nomada lliteratura infantil y xuvenil.
Vicente García Oliva
La primer obra de García Oliva foi ‘Les aventures de Xicu y Ventolín’, llibru espublizáu nel 1982. Tres ésti siguieron otres histories infantiles que daríen pasu a ‘Fontenebrosa: el reinu los silentes’, considerada la primer novela en llingua asturiana destinada a un públicu xuvenil, anque en realidá nun dexa de ser una narración fantástica como pue ser ‘El Hobbit’ de Tolkien.
A Fontenebrosa siguieron-y otres dos partes, ‘Fontenebrosa II: la rebelión de los Homosaurios’ y ‘Fontenebrosa III: el final’. Ente los dos primeros pasaron 25 años y, cola tercera, 31. Ésta última inclusive llevó’l VIII Premiu María Xosefa Canellada de Lliteratura Infantil y Xuvenil, correspondiente al añu 2015.
Esposición sobre Vicente García Oliva y la so obra en Xixón (2016)
Depués llegaron otres munches obres, siendo la primera p’adultos ‘L’aire de les castañes’, nel añu 1989. Inclusive atrevióse col castellanu, yá nesti sieglu, y a emplegar la rede pa dexar dellos apuntes sobre l’actualidá cultural y política nel so blogue ‘Trabayu de campu’, que fai llamar ‘olivines’.
Los neños y neñes de Xixón son tan siguidores de les histories de García Oliva que nesti 2016 entamóse una esposición de nome ‘Vicente García Oliva: un paisanu con munchu cuentu’ con material fechu por escolinos y escolines de Llingua Asturiana sobre la obra lliteraria del escritor. Ésta pudo visitase nel Centru de Cultura Antiguu Institutu.
- ¿Qué otres obres conoces de García Oliva?
- ¿Cuáles yeren los oxetivos de Conceyu Bable?
- ¿Qué otros autores conoces que faigan lliteratura infantil y xuvenil?
- ¿Pa qué val l’Academia de la Llingua Asturiana?