Una esposición d’AsturtOOns protagoniza la Selmana de les Lletres en Samartín del Rei Aurelio
Esti llunes inauguróse en la Casona del Bravial la esposición ‘Asturtoons y les Lletres Asturianes’, que protagoniza la Selmana de les Lletres en Samartín del Rei Aurelio. Pal martes y el miércoles tán previstos dos alcuentros con llectores mozos.
‘Asturtoons y les Lletres Asturianes’ trátase d’una muestra que repasa la trayeutoria d’esta editorial con casi diez años de vida dedicada a la lliteratura infantil y enfotada na promoción del idioma. En total pueden vese la práutica totalidá del mediu centenar de obres qu’asoleyó nesti tiempu, nes que destaca sobre manera la calidá de les sos ilustraciones. La esposición va tar abierta al públicu hasta’l 23 de mayu n’horariu de 9 a 13 hores, de llunes a vienres.
D’igual forma, la Oficina de Normalización Llingüística de Samartín aprovecha esta celebración pa entamar el IV Alcuentru con Escritores, actividá na qu’un grupu d’escolinos y escolines pueden falar colos autores de les sos histories favorites. Mañana va tener llugar la primer de les cites previstes pa esti añu dientro la Selmana de les Lletres, cola presencia en Blimea, a les 10 hores, d’Enrique Carballeira, que va recibir a los alumnos de primeru de Primaria del Colexu Públicu El Parque. El dibuxante y escritor responsable d’AsturtOOns va centrar gran parte de la so intervención na obra ‘Una mascota pa Carola’. Mentes, el miércoles el turnu va ser de los escolinos de quintu y sestu de Primaria del Colexu Públicu Rei Aurelio, de Sotrondio, que van poder conocer a Jorge Fernández, autor de ‘El misteriu de Vassilius Destounis’.
A lo llargo del mes van entamase otres actividaes, ente les que destaca la presentación del llibru de Xavier Frías Conde ‘El misteriu de les histories que s’escribíen soles’, toes elles destinaes a “averar la llingua y la lliteratura asturiana a les xeneraciones más moces, faciéndolos participar d’un mou activu na conocencia del mundu editorial, los escritores y los llibros”, señalen dende’l SNL de Samartín.