Un llendador del ríu visitó a los neños y neñes del Colexu Públicu El Pascón a la espera de L’Anguleru

Los neños y neñes d’Infantil del Colexu Públicu El Pascón, en Tinéu, pudieron entregar el martes les sos cartes pa L’Anguleru. Un llendador de ríu, persona que curia los calces asturianos mientres tol añu, vieno a recoyeles.

Yá queden pocos díes pa que L’Anguleru aporte a Asturies tres pasar tol añu nel mar de los Sargazos curiando de les anguiles y les angules. L’Anguleru viaxa nestes momentos al so país de naciencia na so llancha pa pescar angula en Nuechebona, vendela, y coles perres que saque, mercar regalos a tolos neños y neñes asturianos, qu’entrega esa mesma nueche. L’Anguleru vien en Navidá porque ye época d’angula y entra n’Asturies pel ríu Nalón, onde los guaḥes de L’Arena salen tolos años a recibilu. Darréu, esti personaxe percuerre tolos llugares d’Asturies onde hai agua en busca d’angula. Si los reis de la casa dexen un gorru de llana en Nuechebona baxo l’árbol de Navidá y dalgo de comer y beber pa que pueda reponer fuercies, a la mañana siguiente van atopar los sos regalos nesi mesmu llugar.

A la so llegada a Asturies, esti personaxe vistíu de mariellu y con gorru recibe les cartes de los neños y neñes colos sos pidimientos, que trata de complacer na midida que-y sía posible. La función de recoyer les cartes y faceles llegar a L’Anguleru ye de los llendadores de ríu, persones que se dediquen mientres tol añu a cuirar los calces asturianos. Ún d’ellos, de nome Feito’l Vaqueiru, visitó’l martes a los neños y neñes del Colexu Públicu El Pascón. Ellí respondió les duldes de los guaḥes sobre’l misteriosu pescador y esplicó-yos la importancia del llabor que los llendadores desendolquen pa caltener llimpios los ríos. D’igual forma, por encargu del propiu Anguleru, regaló pa la biblioteca del centru un exemplar de ‘La hestoria de L’Anguleru’, obra de Paloma González, Carmen Alonso y Víctor Raúl Pintado Rey ‘Vitu’, responsable esti últimu de la presencia de Feito nel centru cuartanu tres la mediación de l’Asociación Cultural Garabuxada de L’Arena y l’Asociación de Pescadores El Banzáu.  

La visita del llendador del ríu significó tamién pa los escolinos y escolines una oportunidá p’afondar nel conocimientu de la llingua asturiana, dientro del programa escolar entamáu pol centru.