Un cartafueyu esplica a los padres de neños y neñes de 0 a 3 años ‘Les ventayes del billingüismu n’Asturies’

Con motivu del Día Internacional de la Llingua Materna, la Oficina de Normalización Llingüística de Xixón y Reciella asoleyen un cartafueyu informativu sobre’l billingüismu. Ésti ta destináu a padres de neños y neñes de 0 a 3 años.

‘Les ventayes del billingüismu n’Asturies / Fála-yos. La llingua materna nel contestu global’ ye’l nome d’esta espublización de diez páxines que fala del asturianu nel contestu global y del billingüismu tomando la llingua materna como idioma de partida, amás de dar dellos conseyos últiles pa llevalu alantre nel contestu familiar. Según espliquen dende la Oficina de Normalización Llingüística de Xixón, agora dirixida por Xuan Nel Sáez Hernández, “la nuesa intención ye desarrollar esta campaña nes Escueles Infantiles de 0 a 3 años de Xixón, yá que consideramos que los primeros años de la vida d’un neñu y una neña son un momentu ideal pa l’alquisición llingüística, porque les persones tenemos de piquiñinos abonda capacidá p’asimilar los soníos qu’escuchamos. La capacidá amenorga según pasa’l tiempu, polo que lo meyor ye entamar cuanto primero”.

Ésta va ser la primer fase –de concienciación– d’un programa entamáu a comuña pol SNL xixonés y Reciella que va sumar otra de sensibilización, cola celebración de ‘críucuentos’ nes escueles infantiles de la ciudá, y una tercera d’implantación, yá pal cursu que vien, cola inclusión d’otres actividaes “que profundicen nes idees de valoración y respetu a la diversidá cultural y llingüística d’esta campaña”. La presentación del cartafueyu va tener llugar en díes próximos con un actu nel que ta prevista l’asistencia de Sáez Hernández y d’un representante de Reciella, amás del conceyal d’Educación, Cultural, Mocedá y Festexos, Carlos Rubiera.