Un boletín de calter mensual va informar de les novedaes en materia llingüística nel ámbitu educativu

Un boletín de calter mensual va informar de les novedaes en materia llingüística nel ámbitu educativu

‘Educallingua Informa’, el Boletín Informativu de les Enseñances de Llingua Asturiana y Gallego-asturiano, va trayer tolos meses les novedaes nel ámbitu educativu en materia llingüística. El númberu 1 presenta conteníos diversos y una entrevista a Xulio Arbesú.

La Direición Xeneral de Planificación Llingüística y Normalización anima a tol profesoráu a compartir nesti boletín les sos esperiencies educatives en llingua asturiana o en gallego-asturiano, pa lo qu’ufre’l corréu electrónicu llinguastur@educastur.org, mesma direición a la que se pue dirixir tola xente interesao en recibir esta revista en PDF tolos meses. Ésta divídese en noticies, actividaes escolares y dellos recursos, ente los que destaca una entrevista, que tien a Arbesú nesta ocasión como protagonista.

Ente les noticies d’esti primer mes, destaca en portada la de la dedicación a les escritores de la XXXVIII Selmana de les Lletres Asturianes, asina como la espublización n’asturianu del currículu de Llingua Asturiana y Lliteratura en Secundaria y Bachilleratu, les actividaes previstes pol próximu Día Internacional de la Llingua Materna o l’asoleyamientu del sétimu númberu de la revista ‘Trabatel’, ente otres. Tamién inclúi una estaya, de nome ‘Herbas y florías’, qu’enllaza con un blogue sobre los nomes en gallego-asturiano d’especies vexetales.