TPA va contar con un espaciu de programación infantil n’asturianu: ‘Fálame’

Presta Asgaya

El conseyu d’alministración de RTPA aprobó la creación d’un espaciu infantil en llingua asturiana que va llevar el nome de ‘Fálame’ y de la que se va encargar Médula Producciones. Esta empresa yá fixo ‘Presta asgaya’ y ye la responsable de ‘De folixa en folixa’ o ‘De cai’.

D’esta forma RTPA cumple con una demanda vieya de los coleutivos de defensa del idioma, que víen una programación infantil n’asturianu nel ente públicu de comunicación como una ferramienta fundamental pa la normalización del idioma. “Ye dalgo positivo y mui necesario; un pasu alantre pal usu del asturianu que cumple con ún de los oxetivos de la Llei d’Usos de la RTPA aprobada na Xunta Xeneral”, apunta Vicente González Bernaldo de Quirós, representante d’Izquierda Xunida (IX) nel conseyu d’alministración de la canal, que destacó’l consensu esistente ente tolos miembros d’esti órganu sobre la necesidá de contar con una programación infantil en llingua asturiana.

La empresa encargada de la producción de ‘Fálame’, nome que va tener l’espaciu, ye Médula Producciones, que fora yá responsable del programa infantil ‘Presta asgaya’ nos primeros años de la TPA y que nel so catálogu tien espacios d’ésitu como ‘De folixa o en folixa’, 'Mochileros' o ‘De cai’, fechu n’asturianu dafechu y presentáu por María Cotiello. El llunes próximu va celebrase una reunión nueva del conseyu d’alministración onde s’espera concretar la fecha de comienzu de les emisiones de ‘Fálame’ y otros aspeutos del programa.

Los Bolechas

Nos años últimos, l’espaciu únicu en llingua asturiana pa la reciella foron ‘Los Bolechas’, de la que se tornaron dos temporaes con munchu ésitu d’audiencia pese a la emisión de la segunda temporada n’agostu ensin promoción nenguna. Agora RTPA apuesta por un encargu de producción a una empresa asturiana, como Médula, “porque paez que nun tien munchu sentíu doblar una serie gallega”, señala Bernaldo de Quirós.

Na semeya, personaxes del programa 'Presta Asgaya'.