Sol en los pomares

‘Sol en los pomares’ trátase d’un poemariu en llingua asturiana que ye consideráu como una de les grandes obres poétiques del sieglu XX nel nuesu idioma. Ta dividíu en cinco partes: ‘La sombra de los robles’, ‘La lluz de les roses’, ‘La caleya floría’, ‘Pómpares nel aire’ y ‘La lluna ente carbayos’.

El so autor foi Matías Conde, un xixonés que nació nel 1986 y qu’estudió pa ser profesor mercantil. Mientres na so vida, compaxinó l’enseñu cola creación lliteraria, collaborando en dellos periódicos y selmanarios.
Portada de Sol en los Pomares
Portada de 'Sol en los pomares'
¿Sabíes qué…? Pese a ser una obra n’asturianu, ‘Sol en los pomares’ escribióse y espublizóse en México nel añu 1948.

Conde tamién tuvo actividá política y, cuando llegó la Guerra Civil, lluchó nel bandu republicanu. Como sabes, los nacionales foron los ganadores, entamando una fuerte represesión contra los perdedores, polo que l’escritor escapó hacia Francia cola so familia. Darréu decidría cruciar el charcu y dir a México, país onde viviría hasta la so muerte nel añu 1982.

Mientres la so vida escribió, Conde una cantidá bayurosa de poesíes y cuentos n’asturianu, siendo’l que tuvo una mayor repercusión ‘Sol en los pomares’, un llibru que contó con un prólogu del poeta mexicanu José Vasconcelos y cola importante ilustración de Germán Horacio Robles, fíu de Pachín de Melás, otru gran autor en llingua asturiana que se vio obligáu a marchar al exiliu. Asina, los dibuxos de Germán son un escelente complementu a los poemes de Conde, formando un too espectacular.

Páxina del Sol en los pomares
Páxina de 'Sol en los pomares' 
¿Sabíes qué…?El RIDEA, naquel tiempu IDEA, espublizó n’Asturies el llibru nel añu 1976, anque non de forma completa por mor de la censura.

El dictador Francisco Franco morriera nel 1975, pero los cambios democráticos nun llegaron al momentu. Asina, l’Institutu d’Estudios Asturianos dexó fuera’l poema ‘El solar de Don Pelayo’, nel qu’una muyer torgaba’l pasu a la so propiedá a la Guardia Civil.

Esti añu, l’Academia de la Llingua Asturiana, en collaboración col Conceyu de Xixón, editaron un facsímil de ‘Sol en los pomares’, esto ye, una reproducción exauta del orixinal. Asina, recupérase de mou completu una obra digna de lleer. Amás, la Oficina de Normalización Llingüística, editó una guía didáutica orienta a escolinos de Secundaria obra de Pablo Rodríguez Medina.

  • ¿Por qué escribió Conde ‘Sol en los pomares’ en México?
  • ¿Qué sabes de Pachín de Melás?
  • ¿Por qué’l RIDEA nel 1976 llamábase IDEA?
  • ¿Cuála ye la función de l’Academia de la Llingua Asturiana?

 

Pon n’orde estes etapes de la vida de Matías Conde:

Fina
 
Exíliase en Francia
 
Escribe 'Sol en los pomares'
 
Participa na Guerra Civil
 
Vive en Xixón
 
El so llibru aporta a Asturies
 
Cola pa Mexico
 
7
3
5
2
1
6
4