Selves y desiertos

Reciben’l nome de selva les viesques de zones tropicales carauterizaes pola so humedá alta. Son zones de vexetación densa, con árboles frondosos qu’algamen altures cercanes a los 30 metros y que provoquen la llegada de poca lluz nel suelu, onde predominen los felechos y fongos.

Un desiertu, mentes, ye dalgo contrariu dafechu a les selves. Son territorios ermos, con vexetación mui escasa, onde les lluvies son prauticamente nules. Otra carauterística destacada son les temperatures estremes, que pueden a llegar a ser mui altes pel día y mui baxes, pela nueche, anque lo cierto ye que tamién pueden considerarse desiertos les zones fríes de la tierra, como la tundra o los polos, cubiertos por nieve.
 
Desiertu d'Atacama, ChileDesiertu d'Atacama, Chile
¿Sabíes qué…? La idea que de xuru tendrás d’un desiertu ye d’una superficie de sable que formen dunes, pero lo cierto ye que tamién esisten desiertos de piedra.

Les selves conformen l’habitat de dos tercios de la biodiversidá de fauna y flora del planeta. Los animales que viven nelles suelen ser de tamañu pequeñu, con una variedá grande de mamíferos, reptiles, anfibios, insectos, arácnidos y aves. Tamién destaca la importante riqueza vexetal d’estes zones.

Nun asocede lo mesmo nos desiertos, anque lo cierto ye que la variedá esistente d’especies ye mayor de lo que nun primer momentu se pue pensar. Poles condiciones climatolóxiques, los animales que viven nesta zona son reptiles, como culiebres y llagartos; insectos, como escarabayos; arácnidos, como allacranes; y mamíferos pequeños, como ratones o raposos del desiertu, anque tamién son carautéristicos los camellos y dromedarios. No que respeuta a la flora, ésta ye escasa y dispersa. La planta más carauterística ye’l cactus y, nes poques zones con agua, pueden vese palmeres.

 

Xungla na frontera ente Perú y BoliviaXungla na frontera ente Perú y Bolivia
¿Sabíes qué…? Por mor de les sos dificultaes p’acceder a elles, hai zones selvátiques na Tierra a les que tovía nun llegó l’home. Nelles hai miles d’especies animales y vexetales desconocíes pa nós.

Pulmones de la tierra. Asina pueden considerase a les selves, zones vexetales que, por mor de l’aición humana, cada vegada van menguando más. La selva amazónica, n’América del Sur, ye la más conocida al ser la más estensa, pero tamién hai selves de gran importancia nel Congu (África) o Borneo (Asia), por citar dalgunes de les más nomaes.

La referencia mental que te pue llegar d’un desiertu ye’l de Sáḥara, nel norte d’África, que se carauteriza por ser el caldiu más grande del mundu: 9.065.000 quilómetros cuadraos de superficie. L’Atacama (América), el de Gobi (Asia) y el de Victoria (Oceanía) son l’otros más importante, ensin escaecer la estepa rusa o tundra, l’Árticu y l’Antártida.

 

  • ¿Qué especies son les más carauterístiques de la selva?
  • ¿Hai dalguna selva n’Europa?
  • ¿Qué ye la tundra?
  • ¿Qué zona desértica ye la más cercana a Asturies?

 

Di por qué se carautericen estos desiertos:

Antártida
 
Atacama
 
Gobi
 
Sáḥara
 
Gibson
 
El más estensu
El más grebiu
El más estensu d’Asia
El caldiu más estensu
Predomina la piedra y les roques