Cola fin de facer más llevadera la cuarentena a la reciella y a les families, el Grupu Epona tien lliberaos dellos llibros y cuentos. Éstos pueden lleese y descargase de baldre na web d'esta editorial.
Una clase de deporte "pa ponenos fuertes pa lluchar escontra'l bichu" ye la carta de presentación de Superllingua na rede. Acompañáu de Pequellingua y Minillingua, protagoniza una canal nueva de YouTube col envís d'ufrir a les families recursos prestosos pa trabayar colos pequeños de la casa mientres estos díes de quedar en casa.
Otru de los personaxes que pues atopar nos cuentos de 'A la Gueta los Suaños' ye la xaronca Tista. Nes sos histories esplícanos la so rodiada, lo que nos va permitir saber munches coses sobre la naturaleza asturiana.
Los cantares del discu 'Que nun te tarreza la naturaleza' tamién tán nel karaoke de 'A la Gueta los Suaños', afayadizu pa disfrutar en familia nestos díes de quedar en casa pa salvar el coronavirus. Ún de los que más nos presten ye 'El monstruu soi yo'.
El 21 d’abril habríen de celebrase los XVII Alcuentros de la Mocedá cola Llingua, xornada na que los escolinos de Secundaria de Llingua Asturiana de Xixón celebren actividaes alredor del idioma nel Muséu del Pueblu d’Asturies. La pandemia actual de COVID-19 nun va poder con esta iniciativa, que va desendolcase "#DendeCasa" estos díes gracies a un xuegu virtual basáu nel modelu de cuartu d'escape.
Depués de conocer sobre la llave y prauticala dende'l llar nel xuegu de 'A la Gueta los Suaños', proponémoste una ficha didáutica. Nun va sobre esti deporte, sinón sobre otru tradicional que tien una gran vitalidá n'Asturies, como ye los bolos.
