Samartín del Rei Aurelio celebra unos talleres infantiles de cómic n’asturianu

El mes de payares, dientro de les XIII Xornaes de Lliteratura Infantil y Xuvenil de Samartín del Rei Aurelio, van tener llugar unos talleres infantiles de llectura de cómic n’asturianu. La inscripción ye de baldre y el plazu p’apuntase fina mañana.

Estos talleres tán empobinaos pa neños y neñes de 4 a 11 años y van contar cola presencia de dibuxantes de sonadía, como Enrique Carballeira, David Fernán o Ruma Barbero, o la traductora de los cómics d'Astérix, María Xosé Rodríguez. Los pequeños, gracies a l’ayuda de monitories de l’Asociación Cultural Bocina Nalón, van deprender sobre los cómics al mesmu tiempo que s’averen a la llingua asturiana.

La Oficina de Normalización Llingüística de Samartín del Rei Aurelio en collaboración cola Oficina d’Información Xuvenil del conceyu y Bocina Nalón entamen los talleres, que se dividen en dos turnos. El primeru ta destináu a neños y neñes de 4 a 6 años y va desendolcase, en dos sesiones, los díes 14 y 28 de payares (18 hores) na Casa de la Xuventú de Sotrondio. Mentes, los que tienen ente 7 y 11 años, van dar trés sesiones: los díes 7 y 21, na Casona del Bravial de Blimea, y el 28 en Sotrondio.

Los interesaos n’apuntase nos talleres tienen hasta mañana pa formalizar la inscripción nel númberu de teléfonu 984.11.22.39 o nel corréu electrónicu bocina@bocina.org.