Presentóse en Candás el blog "¿Ayúdote yo?"

Presentóse en Candás el blog "¿Ayúdote yo?"

Con motivu del Día Internacional de la Llingua Materna, dellos servicios de normalización llingüística d’Asturies presentaron güei vienres el blog de la campaña “¿Ayúdote yo?”. Involucrar a distintos grupos d’edaes na conservación y usu del asturianu ye l’oxetivu plantegáu por esta campaña que desendolcaron nel cursu escolar 2014-2015 los conceyos de la Mancomunidá d’El Cabu Peñes, Siero, Castrillón, Samartín del Rei Aurelio y Avilés.

Dende estos conceyos propúnxose una actividá a les families, les escueles o cualesquier grupu de xente interesao pa qu’interactuaren y aportaren testos, vídeos, audios, dibuxos o caricatures de estes frases tan sentíes nes families que yá formen parte de la nuestra vida cotidiana. 

Y asina, el blog presentáu ye’l resultáu d’apilar  tou esi material recoyío los últimos meses y espérase que valga como ferramienta prestoso pa trabayar nes escueles y en familia. 

Na so presentación nel Centru Polivalente “La Baragaña” de Candás tuvieron presentes los responsables de los servicios de normalización llingüística implicaos y  contóse amás cola collaboración del actor Carlos Alba Cellero, que presentó l’actu y ufiertó un monólogu sobre les espresiones que recueye el blog.