Política Llingüística caltién la campaña #Apúntate p’animar a la matriculación n'asturianu y gallego-asturiano
![Cartelu campaña #Apúntante 2021 gallego-asturiano recortada Cartelu campaña #Apúntante 2021 gallego-asturiano recortada](https://asturies.com/sites/default/files/cartelu_campana_apuntante_2021_gallego-asturiano_recortada.jpg)
Yá ta camín de los colexos la cartelería impresa de la campaña añal qu’entama la Direición Xeneral de Política Llingüística p’animar a la matriculación en Llingua Asturiana y en Gallego-asturiano. Repítese la del cursu pasáu, de nome #Apúntante, que va tornar a tener espacios na televisión y na radio, amás de nes redes sociales.
El 22 de xunu abre’l plazu de matrícula en Primaria, hasta’l 28 de xunu, y la campaña busca amosar los atractivos de la materia al alumnáu, qu’ha d’escoyer ente ésta o Cultura Asturiana, que s’imparte en castellanu. N’ESO y Bachilleratu, cuando pasa a ser optativa, compitiendo con una segunda llingua estranxera y otres asignatures, hai dos periodos: del 5 al 16 de xunetu y del 1 al 7 de setiembre.
#Apúntate cuenta, amás de la tradicional cartelería impresa y pa redes sociales, con cuñes de radio y espacios pa televisión nes dos llingües propies que s’estrenaron l’añu pasáu. La campaña xuega col llinguaxe de les nueves teunoloxíes col fin de llegar a les moces y mozos y dan una visión prestosa de la materia con mensaxes intercambiaos ente escolinos como “Apúntante ho”, “Sí que m’apunto, ne!” o “#Vaprestate”.
Adxuntu | Tamañu |
---|---|
![]() | 235.57 KB |
![]() | 239.82 KB |