Océanos y mares

El mar o la mar, que dambes formes puede dicise, ye una porción d’agua salao que cubre bona parte del nuesu planeta. Y como pasa en tierra, la mar divídise y ponemos-y nomes pa identificar cada porción. Varios mares xuntos formen un océano, que ye la porción más grande na que se dixebra’l mar.

Playa de Torimbia (Asturies)Playa de Torimbia (Asturies)

¿Sabíes que…? Hai mares tierra adientro Son grandes llagos d’agua salao que poles sos dimensiones son llamaos mares tamién. Por exemplu el mar Cáspiu, ente Europa y Asia, o’l mar Muertu, n’Oriente Mediu.

Hai nel mundu casi un centenar de mares. N’Europa esisten 19 mares. Algunos sonaránvos bastante, como’l mar del Norte, el Bálticu o’l Mediterranéu, y otros quizás menos como’l Tirrenu, el Célticu o l’Exéu. Y por supeustu’l mar que tenemos nes costes y playes d’Asturies: el Cantábricu.

Los océanos en cambiu son munchos menos. En total hai cinco: l’Atlánticu, el Pacíficu, l’Índicu, l’Árticu y l’Antárticu.

 

Un pesqueruUn pesqueru
¿Sabíes que…? Tolos mares tienen marees, que ye cuando sube o baxa la mar periódicamente, pero según el llugar son mui grandes o casi inexistente. N’Asturies les marees nótense muncho, y hai dos al día. Esi movimientu de la mar llámase vagamar. La marea más grande del mundo produzse en Mont Saint-Michel, nel noroeste de Francia.
De la mar sacamos munches riqueces: pescaos y mariscos colos que nos alimentamos (como’l bonitu, la sardina, el pixín, la ñocla etc.) y sírvenos pa tresportar persones y mercancíes gracies a los barcos, que van de puertu en puertu. Sicasí, convién aprovechar les sos riqueces con cuidao y moderación y ensin contaminalu, por cuenta que cada vez queden menos pexes y la contaminación marina ye un problema cada vez mayor.

 

  • ¿En que se distinguen un mar y un océanu?
  • ¿Sabes los nomes d’a lo menos cinco mares?
  • ¿Qué pexes marinos conoces?
  • ¿Qué ye la vagamar?

 

Xunta ca mar/océanu/llagu saláu col tipu correspondiente

Mar
 
Océanu
 
Llagu saláu
 
Exéu
Índicu
Cáspiu