'Nel y los intraterrestres', historia nueva de Jorge Fernández

Un mozu que vive na zona rural ye'l protagonista de la historia nueva de Jorge Fernández García, de nome 'Nel y los intraterrestres'. Editada por AsturtOOns y ilustrada por Enrique Carballeira, cuenta'l descubrimientu que fai Nel nun prau cerca de casa.

"Ver a Nel salir de casa del so güelu con una fesoria, un palote o una pala al llombu nun yera nada raro. Aquel neñu, que yá diba pa los diez años, tenía munches aficiones. Ente elles habíales más o menos normalines; esto ye, de les que-yos suelen prestar a tolos neños: dir de monte, les acampaes, dir de pesca, montar en bici, etc... Pero, amás d'eso prestáben-y en forma otres dos coses que yá nun yeren tan frecuentes pa un neñu de la so edá" ye la introducción d'esti nueu amigu que, un bon día fai un descubrimientu mui especial nun prau cerca casa. A partir d'ehí vivirá momentos fantásticos nuna historia con final inesperáu.

'Nel y los intraterrestres' ye'l tercer llibru qu'espubliza Jorge Fernández con AsturtOOns, tres 'El lladrón de galletes' (2011) y 'El misteriu del Vassilius Destounis' (2014) y el cuartu de lliteratura infantil, a lo qu'hai que sumar una trayeutoria amplia na narrativa, tocando inclusive'l teatru. La obra tien formatu A5, con 74 páxines con ilustraciones de Carballeira a too color, y cuenta con una encuadernación rústica.