Un monte ye una ellevación del terrén. N’iviernu suel tar cubierto pola ñeve y son el puntu d’orixe de los ríos, que desemboquen nel mar.
Una viesca ye un terrén ocupáu de manera mayoritaria por árboles y maleza. Estes comunidaes de plantes cubren una bona parte del planeta y faen una función perimportante, al ser reguladores del clima y conservadores del suelu. Amás, sirven d’habitat de numberoses especies d’animales. Suelen situase nos montes, anque cuando hai una cierta altura, la vexetación tiende a desapaecer pa dexar pasu a la roca desnuda.
Picu Everest
¿Sabíes que…? El 24 por cientu de la litosfera, la corteya terrestre, son montes. El continente más montañosu, en proporción, ye Asia, con un 58 por cientu de la so superficie.
La cordelera qu’axunta los montes más altos del planeta ye l’Himalaya, n’Asia. Nella atópense les catorce cimes que superen los 8.000 metros d’altor, col Everest como picu más altu, con 8.848 metros. Los siguientes na llista son el K2 (8.611), el Kanchenjunga (8.586) y el Lhotse (8.516). D’esta cordelera nacen dalgunos de los mayores ríos del mundu, como’l Yangtsé, el Ganges o l’Indo.
N’Europa, la cima más alta ye l’Ebrus (5.652), na cordelera del Cáucaso, mentes que n’Asturies trátase de Torre Cerréu, na divisoria ente Asturies y Lleón, con 2.648 metros d’altor. N’otros continentes, esta llista encabécenla l’Aconcagua (América, 6.962) y el Kilimanjaro (África, 5.895).
Viesca del Amazonas
¿Sabíes que…? Los volcanes nun se consideren montes como tal al nun formase por un choque de plaques, anque en realidá trátense d’un monte con una abertura per onde sal llava o fumu, dependiendo del grau d’actividá que tenga –dalgunos tán inactivos–. El más altu del mundu ta na llende ente Xile y Arxentina, el Nevado Ojos del Salado, con un altor de 6.891 metros.
La mayor superficie arbórea del mundo ye l’Amazonas, n’América del Sur, que ye una selva, esto ye, una viesca tropical lluviosa. N’Asturies, el más conocíu de toos ye’l de Munieḷḷos, que ta protexíu baxo la figura de Reserva Natural Integral; tamién ye Reserva de la Biosfera por mandatu de la UNESCO. Ésti asítiase ente los conceyos de Cangas del Narcea, Ibias y Degaña y catalógase como la mayor carbayera del Estáu y una de les meyor conservaes d’Europa.
¿Sabríes dicir dalgún otru monte de los 14 ‘ochomiles’ qu’hai?
¿Cómo se llama la cordelera que crucia Asturies d’este a oeste?
¿En qué país ta la mayor parte del Amazonas?
¿Qué ye un carbayu?
Rellaciona caún d’estes cordeleres col continente nel que tán:
Picu Everest
Viesca del Amazonas