Milio Rodríguez Cueto consigue’l Premiu María Xosefa Canellada de Lliteratura Infantil y Xuvenil

‘Carne de melandru’, de Milio Rodríguez Cueto, llevóse’l Premiu María Xosefa Canellada de Lliteratura Infantil y Xuvenil d’esti añu. El xuráu decididióse, por unanimidá, por esta obra del xixonés ente les seis candidates.

Ana María Fueyo, direutora de Política Llingüística, exerció de presidenta d’un xuráu compuestu pol alcalde de Cabranes, Alejandro Vega, y los escritores y especialistes en lliteratura infantil y xuvenil, Severino Antuña y Mari Luz Pontón. Contó, amás, cola participación d’Alonso Zamora Canellada, fíu de la escritora María Xosefa Canellada, que da nome al gallardón. La decisión tomóse mentes una reunión na Casa de Cultura María Xosefa Canellada, asitiada en Santolaya.

Al premiu, dotáu con 4.000 euros, optaron en total seis trabayos. Ente les obres presentaes, llevóse’l gallardón 'Carne de melandru', al valorar el xuráu que se trata d’una novela con una profundidad narrativa grande y bien resuelta, que recupera la memoria histórica d’una manera afayadiza pa la edá a la que va dirixida y qu’abre caminos nuevos na lliteratura xuvenil n’asturianu. El so autor, Milio Rodríguez Cueto, que se presentó baxo’l nomatu 'Stephan Dedalus', ye autor de noveles, rellatos y ensayos que yá cuenta con dellos premios lliterarios, como’l Fuertes Acevedo d’ensayo (1992 y 1999) o’l Xuan María Acebal de Poesía (2000). El xixonés tamién tien tornáu al nuesu idioma a escritores como Shakespeare, Stevenson, Oscar Wilde o Sade,  y ye autor del blogue 'Escureceres'.