María Luz Pontón cuenta la historia de la elefante Petita
![](https://asturies.com/sites/default/files/Portada%20TROMPETITA%2C%20UNA%20ELEFANTITA%20DE%20MUCHO%20PESO%20%282G%298.jpg)
La collaboradora de ‘A la Gueta los Sueños’, María Luz Pontón, tresllada a la lliteratura la historia de la elefante Petita. Esti animal foi refugáu polos sos compañeros de manada por nun cumplir los cánones de belleza establecíos.
Col nome de ‘Trompetita, una elefantita de mucho peso’, Pontó relata de forma divertida a un públicu infantil l’episodiu de discriminación que sufrió esti animal que vive nel Terra Natura de Benidorm. Petita, nome real del animal, contaba con un pesu mui pequeñu, 2.900 kilos frente a los 4.000 de media de les sos compañeres, lo que facía que tuviera unes faiciones mui marcaes y problemes pa integrase na manada. “Namás lleer la noticia sobre Petita supe que tenía qu’escribir una historia sobre esta elefante tan especial. La probe tuvo que pagar un precio mui altu por ser diferente”, esplicó Pontón na presentación del llibru celebráu nel zoo onde vive l’animal.
La intención de la escritora con esti cuentu ye la de tratar l’acosu escolar, pa lo qu’incluyó na obra un epílogu con aportaciones didáctiques sobre esti tema tan d’actualidá orientáu a padres y educadores. “El relatu de ‘Trompetita, una elefantita de mucho peso’ podía ser un modelu claru d’acosu, y como tal sería de gran utilidá pa reflexonar sobre l’acosu escolar”, afirma Pontón. El llibru, editáu nun formatu grande, ta asoleyáu por Edicions Bellaterra y cuenta con illustraciones de Mabel Piérola.