Los ríos asturianos

Un riu ye una corriente grande d’agua dulce que va per un calce y normalmente va a dar n’otru riu o na mar. Si da n’otru riu llámase afluente.

Los ríos ñacen nos montes, onde l’agua de la lluvia y la ñeve va cayendo pela pendiente hasta zones más llanes. Asturies ye un país onde llueve muncho y hai grandes montes, polo qu’hai munchos ríos, y anque dalgunos lleven bien d’agua, nun son mui llargos porque la distancia ente los montes y la mar nun ye grande, polo qu’acaben morriendo bastante cerca d’onde ñacen.

El Narcea xúntase al NalónEl Narcea xúntase al Nalón

¿Sabíes que…? Nel Seya celébrase la Fiesta de les Piragües, una competición deportiva y tamién folixera nel que compiten piragüistes de munchos países. Toos descienden’l Seya dende Les Arriondes hasta Ribeseya. El primer descensu foi en 1929 y celebrase siempre’l primer sábadu d’agostu.

Los principales ríos asturianos son l’Eo, Navia, Narcea, Nalón, Seya y Deva. Todos van casi siempre nel so recorríu en dirección del sur al norte, desde los cordales hasta la mar. Y tienen afluentes, como’l Nalón, que tien el Caudal, el Trubia, el Nora o mesmamente’l Narcea. O’l Seya, que tien el Dobra, el Güeña, el Ponga y el Piloña.
 
Salmón asturianuSalmón asturianu
¿Sabíes que…? El pexe más famosu de los ríos asturianos ye’l “Campanu”, que ye como se llama al primer salmón que se pesca na temporada.

El Nalón ye’l más grande, con casi 150 kilómetros de llargu. Ñaz na fonte La Nalona, en Tarna, y desemboca en Pravia. El segundu más llargu ye’l Narcea, con casi 100 kilómetros.

Nos ríos asturianos habiten munches especies d’animales. Destaquen les truches y los salmones. Tamién les llóndrigues y sacaberes son habituales en munchos ríos.

 

  • ¿Cuáles son los dos ríos más grandes d’Asturies?
  • ¿Puedes nomar cinco ríos asturianos?
  • ¿Qué animales habiten los ríos?
  • ¿Qué ye’l “Campanu”?