Los escolinos y escolines foron protagonistes na XXXVIII Selmana de les Lletres Asturianes

 Silvia García, Genaro Alonso, Fernando Padilla y José María Lana actu institucional CP Santiago Apostol de Mieres Día de les Lletres

El martes finó la XXXVIII Selmana de les Lletres Asturianes, na que los escolinos y escolines del país foron protagonistes. Dos gales d’entrega de premios, visites guiaes, llectura de poemes y teatru n’asturianu foron les actividaes entamaes nestos díes d’homenaxe a la nuesa lliteratura.

El martes día 2 un visita guiada pel barriu xixonés de Cimavilla destinada a colexos, y la yá tradicional a la Xunta Xeneral, abrió la estaya infantil de la Selmana de les Lletres. Nesta ocasión los colexos convidaos a participar na llectura de poemes foron el Germán Fernández Ramos, d’Uviéu, y Carlos Bousoño, de Bual.

Al día siguiente, otros centros pudieron disfrutar d’otra visita guiada, nesti casu pol cascu históricu n’Uviéu, mentes que pela tarde los escolinos de Primaria y Secundaria de Grau recibieron la entrega de los diplomes del IV Premiu de Poesía Selmana de les Lletres, qu’entama la Fundación Aula de les Metáfores. Yá el xueves, el Teatru de la Llaboral celebró la gala d’entrega del IV Certame de Teatru Escolar en Llingua Asturiana/Gallego-asturiano, que ganó’l Centru Rural Agrupáu Baxu Nalón en Primaria, con ‘Cenicientu’; l’IES de Pravia en Secundaria, con ‘Un fin d’añu sele’; y Iván Fernández Rodríguez y Alejandro Álvarez Estévez (IES Santa Cristina de Ḷḷena), ex aequo na estaya de monólogos, con ‘Mio ma’ y ‘El chiste les madalenes’, de manera respeutiva.

Día de les Lletres

El vienres, con motivu del Día de les Lletres Asturianes, el Colexu Públicu Santiago Apostol, de Mieres, acoyó l’actu escolar institucional d’esti añu. Cola presencia del conseyeru d’Educación y Cultura, Genaro Alonso, entamáronse delles actuaciones y fíxose entrega de los concursos entamaos esti cursu: el XXII Certame de Creación Artística y Lliteraria, el XIV Certame de Cartelismu y el VI Certame de Creación Audiovisual. El llistáu de ganadores pue consultase nos documentos axuntos a esta noticia.

Les actividaes últimes de la Selmana de la Lletra tuvieron como sede’l xixonés Teatru de la Llaboral y consistió na representación del espectáculo ‘Histories detectivesques’, de Guayominí, el llunes pa escolinos de Primaria; y ‘Disculpe, cabelleru’, de Ziz Zag Danza, el martes pa alumnos de Secundaria.

Na semeya, Silvia García, direutora del CP Santiago Apostol; Genaro Alonso, conseyeru d'Educación y Cultura; Fernando Padilla, direutor general de Planificación Lingüística y Normalización; y l'ex direutor del centru, José María Lana, nel actu escolar institucional pol Día de les Lletres Asturianes.