Los animales son seres con movimientu espontaneu que nacen, crecen y muerren. Estos organismos inxeren alimentos pa tener enerxía y respiren oxíxenu pa desenvolver les sos funciones vitales. Tolos animales proceden del desarrollu d’una célula llamada güevu o cigotu que vien de la xunión de los gametos, un espermatozoide y un óvulu, célules especiales que se formen nes gónades, testículos y ovarios, de manera respeutiva. Dependiendo de cada especie, la reproducción sexual faese de delles maneres.
Pela so parte, les plantes tamién son seres que nacen, crecen y muerres, cola diferencia con respueto a los animales en qu’éstes nun tienen movimientu propiu. La reproducción d’estos organismos ye diferente a los animales y los exemplares nuevos nacen al traviés d’una grana, d’espores o de la polinización, ente otros métodos.
Fueya
¿Sabíes qué…? La fotosíntesis ye la forma d’alimentase que tienen les plantes y poder, asina, medrar y desarrollase. Consiste na tresformación de savia bruta en savia ellaborada. Pa esti procesu, que se fai nes fueyes gracies a la lluz solar y a la clorofila de les plantes, ye necesario agua y sales minerales –qu’absorven pelos raigaños– y dióxidu de carbonu, desprendiendo oxíxenu nél.
Esisten munches posibilidaes de clasificación de los animales, anque lo más habitual ye diferenciar los vertebrados de los invertebrados. Los primeros son aquellos que tienen un espinazu, como los anfibios, los reptiles, los peces, les aves y los mamíferos, mentes que los segundos carecen d’él. Nesti grupu atopamos a los artrópodos (moluscos, insectos, arácnidos, equinodermos crustáceos o miriápodos), anélidos o poríferos, ente otros.
Gatu montés européu
¿Sabíes qué…? Los homes somos animales, cola diferencia de que nós somos racionales, esto ye, somo capaces de razonar. El ser humanu, l’homo sapiens, ye un primate de la familia de los homínidos y tien como parientes cercanos al orangután, los goriles, los chimpancés y los bonobos.
La clasificación de les plantes faese según la presencia, ausencia y forma de muérganos fundamentales, como raigaños, tallos, frutos, fueyes y flores, o según la presencia d’ún o dos cotiledones na xerminación de la grana. Xeneralmente diferénciense ente plantes con flor y ensin flor. La flor ye la parte de la planta onde tan los muérganos sexuales.
Según el so tamañu, tamién pueden distinguise según el so tamañu: árboles, arbustos o plantes yerbácees.
¿Qué animales mamíferos conoces?
¿Y artrópodos?
Cita’l nome d’una planta que se reproduza con espores.
¿Qué animales contribúin a la polinización de les flores?
Rellaciona estos vertebraos cola so clasificación:
Fueya
Gatu montés européu