Lluis Aique Iglesias algama’l XI Premiu María Xosefa Canellada

Premiu María Xosefa Canellada de Lliteratura Infantil y Xuvenil

La obra ‘Invisible’, de Lluis Aique Iglesias Fernández, llevó’l XI Premiu María Xosefa Canellada de lliteratura infantil y xuvenil qu’entrega la Conseyería d’Educación y Cultura dientro los Premios Lliterarios 2018. Ye’l segundu que se falla tres l’Alfonso Iglesias de cómic.

La Casa Conceyu de Cabranes acoyó ayeri la reunión del xuráu del gallardón, que tuvo presidíu por Fernando Padilla, direutor xeneral de Planificación Llingüística y Normalización, y compuestu por Berta Piñán, ganadora de la edición pasada; la escritora y especialista en lliteratura infantil y xuvenil Maite González Iglesias; la responsable de la Oficina de Normalización Llingüística de Xixón, María Xosé Rodríguez; l’asesora téunica del Serviciu de Planificación Llingüística y Normalización, Juncal García; l’alcalde de Cabranes, Gerardo Fabián; y el fíu de la escritora que da nome al premiu, Alonso Zamora. Finalmente escoyera a la obra presentada baxo’l nomatu Mon Llera Tardi de títulu ‘Invisible’ al reconocer nella “un tratamientu de temes d’actualidá con personaxes reales, con una bona estructura narrativa y un estilu lliterariu enllenu d’imáxenes simbóliques”.

El so autor resultó ser Iglesias, sotrondín del 1967, que lleva una recompensa de 3.000 euros. Llicenciáu en Filoloxía Inglesa pola Universidá d’Uviéu, ye ganador de diferentes premios lliterarios, ente ellos el primer premiu del XIII Certame de Cuentos Curtios Valentín Palacios (2018); el segundu premiu del XX Concursu de Cuentos Pola Oficialidá del Conceyu de Bimenes (2017) y l’accésit d’asturianu na decimotercer y decimocuarta edición del Concursu de Rellatos Mineros Manuel Nevado (2016 y 2017).

Na semeya, dalgunes de les obres ganadores del Premiu María Xosefa Canellada de lliteratura infantil y xuvenil.