L'horru y la panera

Dos de los símbolos del paisaxe rural asturianu son, ensin dulda, l’horru y la panera. Una simple vuelta peles nueses aldees y alredores de les grandes ciudaes sirve pa decatase de que la so presencia entovía anguaño ye bien numberosa pese a que l’usu col que nacieron estes edificaciones de madera yá ta práuticamente perdíu.

La función de tanto l’horru como de la panera yera la de servir d’almacen de granu y otros alimentos, sirviendo de proteición ente la humedá y los animales, sobre manera ratones. Pese a que muncha xente diferencia dambes edificaciones pol númberu de pegollos, cuatru nel casu del horru y seis nel de la panera, el motivu que sirve pa identificales ye’l teyáu y na forma.


Panera.
¿Sabíes qué…? La difusión de la construcción d’horros n’Asturies diose nos sieglos XV y XVI, tando entovía en pie dalguna edificación d’aquella época..

L’horru tien forma cuadrangular, mentes que la panera ye rectangular. Asina, el primeru cuenta con un teyáu a cuatro agües, mentes que’l segundu modifica la cubierta pa incorporar una cumbrera horizontal. D’igual forma, al tener más tamañu que l’horru, la panera pue incoporar más de seis apoyos.

Esisten dellos tipos d’horros y paneres, pero los más populares son los que siguen el modelu Villaviciosa, el Carreño y l’Ayande. El Villaviciosa estiéndese pel conceyu y los de la so redolada, anque tamién hai exemplos en tola zona central d’Asturies y nel oriente, y destaca por tener una decoración tallada con motivos xeométricos

Horru beyucu en Valdeón.
¿Sabíes qué…? L’horru beyuscu ye l’únicu que tien cubierta a dos agües, con un tamañu menor.

El Carreño, mentes, dase más tarde, nel sieglu XVIII, principalmente en paneres y nos conceyos de Carreño, Castrillón y Llanera, y ye’l que cuenta con más decoración nes fachaes y puertes. Pela so parte, l’Ayande, que se da pal occidente y na mesma época del Carreño, ye más cenciello, con elementos decorativos aisllaos como símbolos solares.

Los horros y paneres, a los qu’hai que sumar los cabazos nel occidente –planta rectangular con poca anchura y cubierta de pizarra a cuatro agües– son tovía mui habituales n’Asturies y tán protexíos, anque la realidá ye que munchos vienense abaxo por mor de la despoblación y la falta d’enfotu de les autoridaes. Dalgunos tán en seriu peligru de desaniciu, como los beyuscos, y dende dellos coleutivos que miren pol patrimoniu del país demanden al Gobiernu polítiques pa la so proteición, como la supresión del pagu del Impuestu de Bienes Inmuebles (IBI) por ser un bien mueble, esto ye, tresportable.

  • ¿Cómo diferenciaríes un horru d’una panera?
  • ¿Pa qué valen estes edificaciones?
  • ¿Qué estilos principales identifiques pola so construcción?
  • ¿Cuáles son los principales problemes qu’atopen pa la so sobrevivencia

 

Xuni estos conceyos cola so capital:

Carreño
 
Llanera
 
Amieva
 
Castrillón
 
Ayande
Villaviciosa
 
Candás
Posada
Sames
Piedrasblancas

La Puela
Villaviciosa